Read nynorsk 1938 Andre Mosebok 40 Bible Online

Andre Mosebok 40 - nynorsk 1938 bible

Andre Mosebok 40

¹Då tala Herren til Moses og sa:

²Den fyrste dagen i den fyrste månaden skal du reisa tabernaklet, møtetjeldet.

³Der skal du setja vitnemålskista og hengja forhenget attfor kista.

⁴So skal du setja inn bordet, og på det skal du leggja det som på det skal vera. Og du skal bera inn ljosestaken og setja upp lampone på han.

⁵Det gullklædde røykofferaltaret skal du setja framanfor vitnemålskista og so skal du hengja upp teppet for døri til tabernaklet.

⁶Brennofferaltaret skal du setja framanfor døri til tabernaklet, møtetjeldet,

⁷og balja skal du setja millom møtetjeldet og altaret og hava vatn upp i henne,

⁸og so skal du setja upp gjerdet kring fyregarden og hengja upp teppet i fyregardsporten.

⁹Sidan skal du taka salvingsoljen og salva tabernaklet og alt som i det er, og helga både tabernaklet og all bunaden i det, so det vert heilagt.

¹⁰Og du skal salva brennofferaltaret og alt det som til høyrer, og helga altaret, og då skal altaret vera høgheilagt.

¹¹Og du skal salva balja og foten ho stend på og helga henne.

¹²So skal du kalla Aron og sønene hans burtåt møtetjelddøri og två dei med vatn,

¹³og du skal klæda Aron i den heilage klædebunaden og salva han og helga han, og so skal han vera prest for meg.

¹⁴Og sønene hans skal du og kalla fram og klæda dei med underkjolar

¹⁵og salva dei, liksom du salva far deira, so dei kann vera prestar for meg, og salvingi skal gjeva dei retten til prestedømet, mann etter mann i all æva.

¹⁶Og Moses gjorde so; han gjorde i alle måtar som Herren sa han fyre.

¹⁷Den fyrste månaden i det andre året, den fyrste dagen i månaden, var det at tabernaklet vart reist.

¹⁸Då reiste Moses tabernaklet: Han sette ned stabbane og reiste upp plankane, la inn tverrstengene og sette upp stolpane,

¹⁹so spana han ut tjeldet yver tabernaklet, og la tjeldtaket ovanpå, alt soleis som Herren hadde sagt Moses fyre.

²⁰So tok han og la vitnemålet ned i kista og sette stengene i og sette nådestolen ovanpå kista.

²¹Og kista sette han inn i tabernaklet og feste upp forhengteppet so det hekk attfor vitnemålskista, alt soleis som Herren hadde sagt Moses fyre.

²²So sette han bordet i møtetjeldet, innåt nørdre veggen, utanfor forhenget,

²³og la brødi i rader på det for Herrens andlet, alt soleis som Herren hadde sagt Moses fyre.

²⁴Ljosestaken sette han og i møtetjeldet, midt for bordet, innmed søre veggen,

²⁵og sette upp lampone for Herrens åsyn, alt soleis som Herren hadde sagt Moses fyre.

²⁶Det gullklædde altaret sette han og i møtetjeldet, framanfor forhenget,

²⁷og brende angande røykjelse på det, alt soleis som Herren hadde sagt Moses fyre.

²⁸So hengde han upp teppet for døri til tabernaklet

²⁹og sette brennofferaltaret frammed døri til tabernaklet, møtetjeldet, og ofra brennoffer og matoffer på det, alt soleis som Herren hadde sagt Moses fyre.

³⁰Balja sette han millom møtetjeldet og altaret og hadde vatn i henne som dei skulde två seg med,

³¹og Moses og Aron og sønene hans tok av vatnet og tvo hender og føter;

³²kvar gong dei gjekk inn i møtetjeldet eller steig fram åt altaret, so tvo dei seg, alt soleis som Herren hadde sagt Moses fyre.

³³So sette han upp garden kringum tabernaklet og altaret og hengde upp teppet i fyregardsporten, og so var Moses ferdig med verket.

³⁴Då sveipte skyi seg kringum møtetjeldet, og herlegdomen åt Herren fyllte tabernaklet.

³⁵Og Moses kunde ikkje ganga inn i møtetjeldet av di at skyi låg yver tjeldet, og herlegdomen åt Herren fyllte tabernaklet.

³⁶Og kvar gong skyi lyfte seg ifrå tabernaklet, tok Israels-borni ut; so gjorde dei på alle ferdene sine.

³⁷Men når skyi ikkje lyfte seg, so tok dei ikkje ut, men drygde til den dagen ho lyfte seg att.

³⁸For Herrens sky låg yver tabernaklet um dagen, og um natti skein ho som eld for augo åt alle Israels-borni på alle ferdene deira.