Read nynorsk 1938 Andre Mosebok 5 Bible Online

Andre Mosebok 5 - nynorsk 1938 bible

Andre Mosebok 5

¹Sidan gjekk Moses og Aron fram for Farao og sa: So segjer Herren, Israels Gud: Lat folket mitt fara, so dei kann halda høgtid for meg i øydemarki!

²Då sa Farao: Kven er Herren som eg skal lyda og lata Israel fara? Eg kjenner ikkje Herren, og eg vil ikkje lata Israel fara heller!

³Dei svara: Hebrearguden hev møtt oss; gjev oss lov å fara tri dagsleider ut i øydemarki og ofra til Herren vår Gud, so han ikkje skal koma yver oss med sott eller sverd!

⁴Då sa egyptarkongen til dei: Moses og Aron, kvi hefter de folket burt frå det dei hev å gjera? Gakk til arbeidet dykkar!

⁵De ser kor mykje folk her er i landet no, sa Farao, og so vil de lokka folket til å leggja ned arbeidet sitt!

⁶Og same dagen sa Farao det til futane og arbeidsmennene for arbeidsfolket:

⁷Heretter skal de ikkje gjeva folket halm til mursteinen, som de fyrr hev gjort. Dei skal sjølve ganga og sanka seg halm.

⁸Men like mykje murstein skal de krevja av dei no som fyrr; de skal ikkje slå av på talet. For dei er late; difor skrik dei og segjer: Me vil av og ofra til Guden vår.

⁹Legg tungt arbeid på karane, so dei hev nok å gjera med det og ikkje fer etter lygjerødor!

¹⁰So gjekk futane og arbeidsformennene ut og sa til folket: So segjer Farao: Eg gjev dykk ikkje halm lenger.

¹¹Gakk sjølve og finn dykk halm kvar de kann! Men i arbeidet dykkar fær de ikkje noko avslag.

¹²Då spreidde folket seg utyver heile Egyptarland og sanka helma til å bruka i staden for halmen.

¹³Men futane dreiv på og sa: Gjer arbeidet dykkar ferdigt, fullt dagsverk til kvar dag, som då de hadde halm for hand!

¹⁴Og arbeidsformennene som futane åt Farao hadde sett yver Israels-borni, fekk hogg, og futane sa: Kvi hev de ikkje gjort ifrå dykk ålaget dykkar anten i går eller i dag, som de fyrr gjorde?

¹⁵Då gjekk arbeidsformennene til Farao og kjærde seg for han og sa: Kvi fer du soleis med tenarane dine?

¹⁶Halm fær me ikkje, og like vel segjer dei til oss: Gjer murstein! Og so fær me hogg, endå det er dine folk som hev skuldi.

¹⁷Men han sa: Late er de, late! Difor segjer de: Me vil av og ofra til Herren!

¹⁸Gakk no av og arbeid! Og halm fær de ikkje, men mursteinen skal de greida, talet fullt!

¹⁹Arbeidsformennene skyna at dei var ille farne, då dei fekk høyra dei ordi: De fær ikkje noko avslag på mursteinen dykkar - fullt dagsverk til kvar dag!

²⁰Då dei kom ut att frå Farao, møtte dei Moses og Aron, som stod og venta på dei.

²¹Då sa dei til dei: Herren heimsøkje dykk og døme dykk for di de hev gjort Farao og tenarane hans hatige på oss og gjeve dei sverdet i handi til å drepa oss med!

²²Og Moses vende seg atter til Herren og sa: Herre, kvi hev du fare so ille med dette folket? Kvi hev du då sendt meg?

²³For alt ifrå den stund eg gjekk fram for Farao og tala i ditt namn, hev han gjort vondt mot dette folket, og du hev ikkje hjelpt folket ditt ein grand.