Read nynorsk 1938 Andre Mosebok 6 Bible Online

Andre Mosebok 6 - nynorsk 1938 bible

Andre Mosebok 6

¹Då sa Herren til Moses: No skal du sjå kva eg vil gjera med Farao: Mi sterke hand skal nøyda han til å sleppa dei, og for den same sterke handi skuld skal han jamvel driva dei ut or landet sitt.

²Og Gud tala endå meir til Moses og sa til han: Eg er Herren.

³Eg synte meg for Abraham og for Isak og for Jakob og nemnde meg Gud den allmektige, men dette namnet mitt, Herren, gjorde eg ikkje kunnigt for dei.

⁴Og eg gjorde mi pakt med dei eg lova å gjeva dei Kana'anslandet, det landet dei heldt til i då dei ferdast på jordi.

⁵Og no hev eg høyrt korleis Israels-borni sukkar av di egyptarane held dei i trældom, og eg minnest pakti mi.

⁶Seg no til Israels-borni: Eg er Herren, eg vil taka av dykk dei tunge byrdene de ber for egyptarfolket, og løysa dykk or trældomen dei held dykk i, og fria dykk ut med fast arm og strenge domar;

⁷eg vil taka dykk til mitt folk og vera dykkar Gud, og de skal sanna at eg er Herren dykkar Gud, som tek av dykk dei tunge byrdene de ber for egyptarfolket.

⁸Og eg vil føra dykk til det landet som eg rette handi i veret på at eg vil gjeva Abraham og Isak og Jakob, og det vil eg gjeva dykk til eiga, eg er Herren.

⁹Og Moses sa det til Israels-borni, men dei høyrde ikkje på han, av di dei var modlause og laut træla so hardt.

¹⁰Då tala Herren til Moses og sa:

¹¹Gakk fram for Farao, egyptarkongen, og seg til han at han skal lata Israels-borni fara ut or landet sitt!

¹²Og Moses svara og tok til ords, der han stod fram for augo åt Herren: Du ser Israels-borni vil ikkje høyra på meg; er det då ventande at Farao skulde lyda etter det eg segjer, eg som endå hev u-umskorne lippor!

¹³Soleis tala Herren til Moses og Aron og sende dei til Israels-borni og til Farao, egyptarkongen, med det bodet at dei skulde føra Israels-borni ut or Egyptarland.

¹⁴No skal de høyra kva ættefederne deira heitte: Sønene åt Ruben, eldste son åt Israel, det var Hanok og Pallu, Hesron og Karmi. Dette er Rubens-ættene.

¹⁵Sønene åt Simeon var Jemuel og Jamin og Ohad og Jakin og Soar og Saul, som var son åt ei kvinna av Kana'ans-folket. Dette er Simeons-ættene.

¹⁶So er namni på sønene åt Levi med ættgreinene deira: Gerson og Kahat og Merari. Og levedagane åt Levi vart hundrad og sju og tretti år.

¹⁷Sønene åt Gerson var Libni og Sime'i med ættgreinene deira:

¹⁸Sønene åt Kahat var Amram og Jishar og Hebron og Ussiel. Og levedagane åt Kahat vart hundrad og tri og tretti år.

¹⁹Sønene åt Merari var Mahli og Musi. Dette er Levi-ættene etter ættetavla deira.

²⁰Amram tok Jokebed, farsyster si, til kona, og dei fekk sønene Aron og Moses. Og levedagane åt Amram vart hundrad og sju og tretti år.

²¹Sønene åt Jishar var Korah og Nefeg og Sikri.

²²Sønene åt Ussiel var Misael og Elsafan og Sitri.

²³Aron tok Eliseba til kona; ho var dotter åt Amminadab og syster åt Nahson, dei fekk sønene Nadab og Abihu, Eleasar og Itamar.

²⁴Sønene åt Korah var Assir og Elkana og Abiasaf. Dette er Korah-ættene.

²⁵Eleasar, son åt Aron, tok ei dotter åt Putiel til kona, og dei fekk sonen Pinehas. Dette var gamlefederne åt Levi-folket med ættgreinene deira.

²⁶Desse mennene, Aron og Moses, var det Heren sa det til: Før Israels-borni ut or Egyptarland, fylking etter fylking!

²⁷Dei var det som tala med Farao, kongen i Egyptarland, og sa dei skulde føra Israels-folket ut or Egyptarland, desse tvo mennene, Moses og Aron.

²⁸Og det gjekk so til at den gongen Herren tala til Moses i Egyptarlandet,

²⁹då sa Herren til Moses: Eg er Herren. Seg no til Farao, egyptarkongen, alt det eg segjer til deg!

³⁰Og Moses svara, der han stod for Herrens augo: Du veit eg hev u-umskorne lippor; er det då ventande at Farao vil høyra på meg?