Read nynorsk 1938 Andre Mosebok 7 Bible Online

Andre Mosebok 7 - nynorsk 1938 bible

Andre Mosebok 7

¹Då sa Herren til Moses: Sjå, eg hev laga det so at du vert som ein Gud for Farao, og Aron, bror din, skal vera profeten din.

²Du skal tala alt det eg segjer deg fyre, men Aron, bror din, skal orda det ut for Farao, so han let Israels-borni fara ut or landet sitt.

³Men eg vil herda hugen åt Farao, og sidan vil eg gjera mange teikn og under i Egyptarlandet.

⁴Farao kjem ikkje til å høyra på dykk, og då vil eg leggja mi hand på Egyptarland og føra herane mine, folket mitt eige, Israels-borni ut or Egyptarlandet med harde refsingar.

⁵Og egyptarane skal ljota sanna at eg er Herren, når eg rettar handi mi utyver Egyptarlandet og tek Israels-borni beint ifrå dei.

⁶Og Moses og Aron gjorde dette; som Herren hadde sagt dei fyre, so gjorde dei.

⁷Moses var åtti og Aron tri og åtti år gamal, då dei tala med Farao.

⁸Og Herren sa det til Moses og Aron:

⁹Når Farao talar til dykk og segjer: Lat meg få sjå eit under av dykk! då skal du segja til Aron: Tak staven din og kasta han ned framfor augo åt Farao, so skal han verta til ein stor orm.

¹⁰So gjekk Moses og Aron fram for Farao og gjorde som Herren hadde sagt: Aron kasta ned staven sin framfor augo åt Farao og tenarane hans, og staven vart til ein diger orm.

¹¹Då sende Farao bod etter vismennene og trollkarane, runemeistrane som dei hadde i Egyptarland, og dei bruka trollkunstene sine og gjorde det same.

¹²Dei kasta kvar sin stav, og dei vart til store ormar; men staven hans gløypte stavane deira.

¹³Og det gjekk som Herren hadde sagt: Farao var strid i hugen og vilde ikkje høyra på dei.

¹⁴Då sa Herren til Moses: Farao er trassig; han vil ikkje lata folket fara.

¹⁵Gakk til han i morgon tidleg - då kjem han ned åt elvi - og statt på elvebakken, so møter han deg, og staven som vart skapt um til ein orm skal du hava i handi.

¹⁶Og so skal du segja til han: Herren, Hebrearguden, hev sendt meg til deg og segjer: Lat folket mitt fara, so dei kann tena meg i øydemarki! Men det hev ikkje du vilja lydt på endå.

¹⁷Og Herren segjer so: Dette skal du hava til merke på at eg er Herren: Sjå no slær eg i elvevatnet med denne staven som eg hev i handi mi, og so skal det verta til blod.

¹⁸Og fisken i elvi skal døy og ein illtev stiga frå elvi, so egyptarane ikkje er god til å drikka vatnet i henne.

¹⁹Sidan sa Herren til Moses: Seg til Aron: Tak staven og rett handi di ut yver Egyptarlands-vatni, yver elvane og veitene og tjørnene deira og yver kvar vassdam der er, so skal dei verta til blod, og blod skal det vera utyver Egyptarlandet, både i trekoppar og steinkjer.

²⁰Og Moses og Aron gjorde som Heren hadde sagt; Aron lyfte staven og slo i elvevatnet so dei såg på det både Farao og tenarane hans, og alt vatnet i elvi vart blod.

²¹Då døydde all fisken i elvi, og det stod ein ond tev av elvi, so egyptarane ikkje kunde drikka vatnet, og det var blod i heile Egyptarlandet.

²²Men runemeistrane deira bruka trollkunstene sine og gjorde det same. Og det gjekk som Herren hadde sagt: Farao var stridhuga og høyrde ikkje på dei.

²³Og Farao snudde seg og gjekk heim til huset sitt og brydde seg ikkje um dette heller.

²⁴Men alle egyptarane grov kringum elvi etter drikkevatn; for dei kunde ikkje drikka elvevatnet.

²⁵So leid det sju dagar etter Herren hadde gjort elvi til blod.