Read nynorsk 1938 Job 10 Bible Online

Job 10 - nynorsk 1938 bible

Job 10

¹Mi sjel er leid av livet mitt; no vil eg sleppa laus mi klaga og tala i min såre hugverk.

²Eg vil segja til Gud: Fordøm meg ikkje, seg meg kvifor du strider mot meg!

³Finn du det godt å gjera vald, å vanda det som dine hender laga, og lata ljoset ditt få skina yver gudlaust råd?

⁴Er augo dine manneaugo? Ser du som menneske plar sjå?

⁵Er dine dagar liksom dagane åt mennesket? Er dine år som mannsens dagar? -

⁶med di du leitar etter mi misgjerning og granskar etter syndi mi,

⁷endå du veit at eg er ikkje gudlaus, og at det ingen finst som bergar or di hand.

⁸Med dine hender hev du dana meg og skapt meg, heilt og i alle måtar, og so tyner du meg no!

⁹Kom i hug at du hev forma meg som leiret, og no let du meg verta mold att!

¹⁰Let du meg ikkje renna ut som mjølk og sidan stivna liksom ost?

¹¹Du klædde meg med hud og kjøt, vov meg i hop med bein og senar.

¹²Du gav meg både liv og miskunn, di umsut verna um mi ånd.

¹³Og dette gøymde du i hjarta, eg veit du hadde det i tankar: /[9]

¹⁴Du vilde vakta på meg når eg synda, og ikkje gjeva til mitt brot;

¹⁵um eg var skuldig, usæl eg! Um skuldfri, fekk eg ikkje lyfta hovudet, mett som eg var av skam og med mi naud for augo;

¹⁶og lyfte det seg lel, so jaga du meg som ei løva, og fór uskynleg med meg att;

¹⁷du førde nye vitne mot meg og harmast endå meir på meg og sende mot meg her på her.

¹⁸Kvi let du meg då koma ut or morslivet? Eg skulde fenge døytt fyrr noko auga såg meg;

¹⁹eg skulde vore som eg aldri hadde vore til; dei skulde bore meg frå morslivet til gravi.

²⁰Er ikkje mine dagar få? - Gjev han heldt upp og let meg vera, so eg fekk ei liti gleda,

²¹fyrr eg gjeng burt og ikkje vender att, til myrkret og til daudeskuggelandet,

²²eit land so myrkt som svarte natti, der daudeskugge og vanskipnad råder, der dagsljoset er som den myrke natti.