Read nynorsk 1938 Job 12 Bible Online

Job 12 - nynorsk 1938 bible

Job 12

¹Då tok Job til ords og sa:

²Ja visst, de er dei rette folk, og visdomen døyr ut med dykk.

³Eg og hev vit, plent liksom de, eg taper ikkje der mot dykk; kven veit då ikkje slikt som dette?

⁴Til spott for mine vener er eg, eg som fekk svar frå Gud på bøneropet, til spott er eg, den rettvise og reine.

⁵Ulukka er vanvyrdnad verd - slik tenkjer dei som trygge er; vanvyrdnad ventar alle som er ustøde på foten.

⁶Tjeldi åt valdsmenn stend i ro, trygge er dei som harmar Gud, dei som hev Gud i handi si. /[11]

⁷Men spør du dyri, dei skal læra deg, og fuglane i lufti, dei gjer grein,

⁸eller tala til jordi, ho skal læra deg, og fiskane i havet skal fortelja.

⁹Kven skynar ikkje på alt dette, at det er Herrens hand som skapte det?

¹⁰For i hans hand er sjeli i kvart liv og åndi i kvar mannelekam.

¹¹Er det 'kje so at øyra prøver ord, som gomen kjenner korleis maten smakar?

¹²Hjå folk med gråe hår er visdom, og vit fær dei som lever lenge.

¹³Visdom og velde er hjå han, og råd og vit høyrer han til.

¹⁴Det han riv ned, vert aldri uppatt-bygt; stengjer han for ein mann, kann ingen lata upp.

¹⁵Han stemmer vatnet, so det turkast burt, han slepper det - då øydelegg det jordi.

¹⁶Hjå han er både kraft og visdom; vegvill og vill-leidar er båe i hans vald.

¹⁷Rådsherrar fører han som fangar, og domarar gjer han til dårar.

¹⁸Han løyser tvangsband kongar knytte, legg reip um livet på dei sjølve.

¹⁹Han fører prestar burt som fangar, mektige menner støyter han ned.

²⁰Frå røynde menner tek han mælet, og klokskapen frå gamle folk.

²¹Vanvyrdnad øys han yver fyrstar og løyser beltet på dei sterke.

²²Han dreg det dulde fram or myrkret og fører daudeskugge fram i ljoset.

²³Han aukar folki, og han let dei øydast; han gjer det romt for dei, men flyt dei sidan burt.

²⁴Frå landsens hovdingar tek han forstandet og let dei villa i ei veglaus heid;

²⁵dei fumlar kring i myrkret utan ljos, han let dei raga liksom drukne folk.