Read nynorsk 1938 Job 22 Bible Online

Job 22 - nynorsk 1938 bible

Job 22

¹Då tok Elifas frå Teman til ords og sa:

²Kann vel ein mann vera til gagn for Gud? Nei, berre seg sjølv gagnar den vituge.

³Hev den Allmektige vel nokon bate av di rettferd, er det til vinning for han at du ferdast rett?

⁴Er det din gudlegdom han refser deg for, gjeng han til doms med deg for den?

⁵Er ikkje vondskapen din stor, misgjerningane dine utan ende?

⁶Du panta brørne dine grunnlaust, og av dei nakne drog du klædi.

⁷Den trøytte gav du ikkje vatn, den svoltne neitta du ditt brød.

⁸Men den som for med vald, fekk landet, den som var høgvyrd, budde der.

⁹Du jaga enkjor burt med tome hender, og armane på farlause vart knasa.

¹⁰Difor ligg snaror rundt ikring deg, og brått set redsla støkk i deg.

¹¹Eller ser du kanskje ikkje myrkret og flaumen som gjeng yver deg?

¹²Bur ikkje Gud i himmelhøgd? Og sjå dei øvste stjernone, kor høgt dei stend!

¹³Og endå segjer du: Kva veit vel Gud? Kann han vel døma gjenom myrkret?

¹⁴Skyene heng attfor, so han ikkje ser, og uppå himmelkvelven gjeng han.

¹⁵Vil du då fylgja same stigen som illverksmenner gjekk i gamle dagar,

¹⁶dei som vart rivne burt i utid, og deira grunn flaut undan som ei elv,

¹⁷som sa til Gud: Gakk burt frå oss! Kva kann den Allmektige vel gjera for oss? -

¹⁸endå han fyllte deira hus med det som godt var? - Men tankane åt dei ugudlege er langt frå mine tankar. -

¹⁹Dei rettvise såg det med gleda, og dei skuldlause spotta dei: /[29]

²⁰Ja, no er fiendane våre tynte, og eld hev øydt all deira ovnøgd.

²¹Forlik deg no med han, so fær du fred! Og so skal lukka timast deg.

²²Tak imot lærdom av hans munn, og legg deg ordi hans på hjarta!

²³Vender du um til den Allmektige, vert lukka di bygd upp på nytt; men du lyt hava urett burt frå tjeldi dine.

²⁴Ja, kasta gullet ditt i moldi, ditt Ofir-gull imillom bekkesteinar!

²⁵Då skal den Allmektige vera ditt gull, vera som haugar av sylv for deg;

²⁶for du skal gleda deg i den Allmektige og lyfta åsyni til Gud.

²⁷Når du då bed til han, so vil han høyra deg, og det du lovar, det skal du få halda;

²⁸set du deg noko fyre, skal det lukkast for deg, og yver dine vegar skal det skina ljos;

²⁹ber dei mot djupet, skal du segja: Upp! Og han skal frelsa den som slær sitt auga ned;

³⁰ja, han skal berga jamvel den som ikkje er uskuldig; ved reinleiken i dine hender skal han verta berga. /[30]