Read nynorsk 1938 Job 26 Bible Online

Job 26 - nynorsk 1938 bible

Job 26

¹Då tok Job til ords og sa:

²Kor du hev hjelpt den maktlause og studt den arm som ingen styrke hev!

³Kor du hev gjeve den uvise råd, for yvermål av visdom du hev synt!

⁴Kven hev du bore ordi dine fram for, og kven si ånd hev tala gjenom deg?

⁵Helheimens skuggar skjelv i angest, vassdjup og dei som bur i dei.

⁶Helheimen ligg i dagen for han, og avgrunnen er ikkje gøymd.

⁷Han breider Nordheimen ut yver audni, han hengjer jordi upp på inkje.

⁸I sine skyer bind han vatni saman, og skyene brest ikkje under dei.

⁹Han stengjer att so ingen ser hans kongsstol, han breider sine skyer yver han.

¹⁰Ei grensa drog han i ein ring på vatni, langt ute, der som ljos og myrker møtest.

¹¹Stolpane under himmelen skjelv, og redde vert dei for hans trugsmål.

¹²Han reiser havet med si kraft og krasar Rahab med sitt vit.

¹³Ved hans ande klårnar himmelen; hans hand gjer av med den flogsnare draken.

¹⁴Sjå, dette er utkanten berre av hans verk; ei kviskring berre av det ord me høyrer. Hans veldes toredun - kven skynar den?