Read nynorsk 1938 Job 33 Bible Online

Job 33 - nynorsk 1938 bible

Job 33

¹Men høyr no, Job, på talen min og lyd på alle mine ord!

²Sjå, eg hev opna mine lippor, alt talar tunga i min munn.

³Truverdige og ærlege er mine ord, og endefram skal mine lippor bera fram min kunnskap.

⁴Guds Ande er det som hev skapt meg, og anden ifrå den Allmektige held meg i live.

⁵Dersom du kann, so svara meg! Væpna deg mot meg og stig fram!

⁶Eg er din likemann for Gud, eg og er laga utav leir.

⁷Redsla for meg tarv ikkje taka deg, mitt velde ikkje tyngja på deg.

⁸Men du hev sagt for øyro mine, so lydde ordi som eg høyrde:

⁹Uskyldig er eg, utan brot, flekklaus er eg og fri for misgjerd;

¹⁰men Gud vil hava uvensgrunnar mot meg, han held meg for ein fiendsmann;

¹¹han set i stokken mine føter og vaktar alle mine vegar.

¹²Nei, dette hev du ikkje rett i, svarar eg; Gud er då større enn eit menneske.

¹³Kvi krev du han til rekneskap? Han svarar ikkje med eit ord.

¹⁴Men EIN gong talar Gud, ja tvo dersom ein ikkje aktar på det.

¹⁵I draumar og i syn ved natt, når tunge svevnen fell på folk, når dei ligg blundande på lægjet,

¹⁶då let han øyro upp på dei og set innsigle på åtvaringi til dei,

¹⁷for å få mennesket burt frå si gjerning og rydja ovmod ut hjå mannen

¹⁸og berga sjeli hans frå gravi og livet hans frå spjotodd-daude.

¹⁹Han vert og refst med liding på sitt lægje, og stendig uro gjeng igjenom merg og bein.

²⁰Hans liv fær mothug imot brød og sjeli hans mot lostemat.

²¹Hans kjøt vert upptært, so ein ikkje ser det meir, hans bein, som ikkje synte fyrr, ligg berre;

²²og nær til gravi kjem hans sjel, hans liv til daude-englane.

²³Er det då innmed han ein engel, ein millommann, ein utav tusund, som kunngjer mennesket den rette vegen,

²⁴so vil Gud ynkast yver han og segja: Fria han frå å fara ned i gravi! No hev eg fenge løysepengar.

²⁵Då vert hans lekam frodigare enn i yngdi, då vert han atter som i sine ungdomsdagar.

²⁶Han bed til Gud, og han er nådig mot han; med jubel skodar han Guds åsyn, og han gjev mennesket rettferdi att.

²⁷Han syng for menneski og segjer: Vel synda eg og krenkte retten, men eg fekk ikkje lika for det;

²⁸han fria sjeli, so ho ikkje gjekk i grav, og no ser livet mitt med gleda ljoset.

²⁹Sjå, alle desse ting gjer Gud tvo gonger, ja dei tri, mot mannen,

³⁰når han vil berga sjeli hans frå gravi, so ljoset åt dei levande kann stråla kring han.

³¹Gjev gaum då, Job, og høyr på meg! Ver tagal du, so eg fær tala!

³²Um du hev ord, so svara meg! Tala, eg gjev deg gjerne rett!

³³Hev du det ikkje, høyr so du på meg! Teg still, so du hjå meg kann læra visdom!