Read nynorsk 1938 Job 35 Bible Online

Job 35 - nynorsk 1938 bible

Job 35

¹Og Elihu tok til ords att og sa:

²Meiner du vel at det er rett, du som hev sagt: Eg er rettvisare enn Gud,

³at so du spør: Kva gagnar det meg, kva bate hev eg um eg ikkje syndar?

⁴På dette vil eg svara deg, ja dine vener og med deg.

⁵Vend auga upp mot himmelen og sjå, gjev akt på skyene høgt yver deg!

⁶Kva tru du gjer han med di synd? Kva skade veld du han um dine brot er mange?

⁷Kva kann du gjeva han um du er rettvis, kva fær han vel utav di hand?

⁸Nei, berre for eit menneske, din like, kann gudløysa di hava noko på seg, og berre for eit mannsbarn all di rettferd.

⁹Dei ber seg ille for dei mange valdsverk; dei skrik um hjelp mot armen åt dei mektige.

¹⁰Men ingen segjer: Kvar er Gud, min skapar, han let lovsongar ljoma midt um natti, /[43]

¹¹han som gjev oss meir vit enn dyri uti marki og gjer oss vise framum fuglane i lufti?

¹²Då fær dei ropa utan svar um hjelp mot ovmod hjå dei vonde.

¹³Visst høyrer ikkje Gud på tome ord, slikt ansar ikkje den Allmektige.

¹⁴Jamvel når du segjer at du ikkje ser han, so ser han nok di sak, og du lyt bia på han.

¹⁵Men no, av di du ikkje gjer det, heimsøkjer han deg i sin vreide, han aktar ikkje stort på ovmods-ord.

¹⁶Og Job let upp sin munn med fåfengd, han brukar mange ord, fåvitug som han er.