Read nynorsk 1938 Job 38 Bible Online

Job 38 - nynorsk 1938 bible

Job 38

¹Og Herren svara Job or stormen og sa:

²Kven er vel han som gjer mi rådgjerd myrk med ord som reint er utan skyn?

³Vel, spenn no beltet på deg som ein mann! So vil eg spyrja deg, og du skal læra meg.

⁴Kvar var du då eg grunna jordi? Seg fram, um du hev greida på det!

⁵Kven sette måli hennar? Veit du det? Kven spana mælesnor ut yver henne?

⁶Seg, kvar vart hennar stolpar feste? Kven la vel hennar hyrnestein,

⁷med' alle morgonstjernor jubla, alle Guds søner ropa høgt av frygd?

⁸Kven stengde havet inn med dører, då det braut fram og kom or morslivet,

⁹den gong eg klædde det med skyer og sveipte det i myrkeskodd

¹⁰og merkte av ei grensa åt det og sette både bom og dører

¹¹og sa: Hit kjem du, ikkje lenger, her skal dei stogga, dine byrge bylgjor?

¹²Kalla du nokosinne dagsprett fram, synte du morgonroden staden hans,

¹³so han tok tak i jardane åt jordi, og dei ugudlege vart riste av?

¹⁴Då tek ho form som leiret under seglet, og allting ter seg greinleg som ein klædnad;

¹⁵då misser dei ugudlege sitt ljos, den arm som lyfte seg, vert knasa. /[50]

¹⁶Kom du vel fram til havsens kjeldor, og gjekk du kring på djupsens botn?

¹⁷Hev daudsens portar synt seg for deg, ja, såg du daudeskuggens portar?

¹⁸Såg du utyver viddene på jordi? Kjenner du alt i hop, so lat oss høyra!

¹⁹Kvar er vel vegen dit som ljoset bur? Og myrkret - kvar hev det sin heim,

²⁰so du kann henta det til riket der det råder og kjenna stigane til huset det held til i?

²¹Du veit det vel; du vart då fødd den gongen, og dagetalet ditt er stort.

²²Tru du hev vore der som snøen kjem frå, hev set dei forrådshus der haglet ligg,

²³som eg hev spart til trengsletidi, den dag som kjem med kamp og krig?

²⁴Kva veg fer ljoset når det deiler seg, og austanvinden når han spreider seg på jordi?

²⁵Kven opna rennor, tru, for regnet og brøytte veg for eldingen,

²⁶so det fekk regna i eit land der ingen bur, ei øydemark der inkje menneske held til,

²⁷so aude heidi kunde mettast og graset renna upp or grunnen?

²⁸Skal tru um regnet hev ein far? Kven avla vel doggdropane?

²⁹Kva morsliv kom vel isen or, kven trur du åtte himmel-rimet?

³⁰Sjå, vatnet hardnar liksom stein, og havsens flata stivnar til.

³¹Sjustjerne-bandet - kann du knyta det? Orions lekkjor - kann du løysa dei?

³²Kann du få Dyrering-bileti fram i rette tid, og Bjørnen og hans ungar - kann du styra deira gang? /[51]

³³Kjenner du himmel-lovene? Og skipar du hans velde yver jordi?

³⁴Kann røysti di nå upp til skyi, so vatnet fløymer yver deg?

³⁵Kann du vel senda ljoni, so dei fer av stad, og svarar dei deg: Ja, her er me?

³⁶Kven hev lagt visdom i dei myrke skyer, kven hev lagt vit i luftsynet?

³⁷Kven tel vel skyene med visdom, og himmel-hitane - kven tømer dei,

³⁸når mold renn saman til ein deig, jordklumpar kleimer seg i hop?