Read nynorsk 1938 Job 4 Bible Online

Job 4 - nynorsk 1938 bible

Job 4

¹Då tok Elifas frå Teman til ords og sa:

²Um ein baud til å tala eit ord til deg, tok du då ille på det? Men kven kann halda ordi att?

³Sjølv hev du tala mange til rettes, og maktlause hender hev du styrkt;

⁴dine ord reiste upp den som snåva, og kne som veikna, gav du kraft.

⁵Men no, når det gjeld deg sjølv, vert du utolug, når det råmar deg, so reddast du.

⁶Er ikkje din gudlegdom di tiltru, di ulastande ferd di von?

⁷Tenk etter: Kven let livet skuldlaus? Kvar gjekk rettvise folk til grunns?

⁸Stødt såg eg: Dei som pløgde urett og sådde naud, dei hausta slikt.

⁹Dei stupte for Guds andedrag, og for hans vreide-pust vart dei til inkjes.

¹⁰Ei løva bura, men det fæle målet tagna, og tennene på ungløva vart knasa.

¹¹Av skort på rov laut løva døy, og løveungane vart spreidde.

¹²Og til meg kom eit ord i løynd; for øyra let det som ei kviskring,

¹³med' tankar kom og for ved nattesyner, då svevnen la seg tung på folk.

¹⁴Då kom ein otte på meg, so eg bivra, og alle mine bein tok til å skjelva.

¹⁵Ei ånd for framum andletet - då reiste håri seg på kroppen.

¹⁶Ho stogga, men eg kunde ikkje rett skilja korleis ho såg ut - ein skapnad stod der framfor augo; eg høyrde susing og ei røyst:

¹⁷Er mennesket rettferdigt, tru, for Gud? Er mannen rein framfor sin skapar?

¹⁸Sjå, tenarane sine trur han ikkje, hjå sine englar finn han lyte - /[2]

¹⁹enn meir hjå dei som bur i hus av leir, som hev sin grunnvoll nedi moldi - dei som kann knasast lett som molen.

²⁰Frå morgon og til kveld - so ligg dei krasa; fyrr nokon ansar det, gjeng dei til grunns for alltid.

²¹Vert ikkje deira tjeldsnor rivi ut? Dei døyr, men visdom eig dei ikkje. /[3]