Read nynorsk 1938 Job 41 Bible Online

Job 41 - nynorsk 1938 bible

Job 41

¹So djerv er ingen at han torer terga han; kven vågar då å reisa seg mot meg?

²Kven gav meg noko fyreåt, so eg laut gjeva lika for det? Alt under himmelen er mitt.

³Eg tegjer ikkje um hans lemer, hans styrke og hans vene bygnad.

⁴Kven hev vel drege klædnaden hans av han? Kven vågar seg inn um hans doble tanngard?

⁵Kven hev vel opna kjakedøri hans? Ikring hans tenner ligg det redsla.

⁶Byrge er radene av skjoldar; attlaten er kvar ein med fast forsigling.

⁷Tett ligg den eine innåt hin, og ingi luft slepp millom dei.

⁸Den eine skjolden heng i hop med hin; dei grip uskiljande inn i kvarandre.

⁹Ljos strålar fram kvar gong han nys, og augo er som kvarmane åt morgonroden.

¹⁰Brandar fer ut or gapet hans, eldgneistar sprutar derifrå.

¹¹Or naseborone kjem røyk som or ein kjel med sev-eld under.

¹²Hans ande kveikjer eld i kol, og logar stend ut or hans gap.

¹³På halsen hans hev styrken bustad, og redsla hoppar fyre han.

¹⁴Kjøtvalkane sit fast innåt, urikkande, som støypte på han.

¹⁵Hjarta i han er fast som stein, ja, fast som understein i kverni.

¹⁶Kjempor vert fælne når han ris; av redsla vert dei reint ifrå seg.

¹⁷Um sverdet råmar han, so bit det ikkje på han, og ikkje langspjot, piler eller kastespjot.

¹⁸Han aktar jarn som var det strå, og kopar nett som fauskeved.

¹⁹Han flyr ikkje for bogesonen; stein ifrå slyngja vert som halm for han. /[56]

²⁰Stridsklubbor reknar han for halm, han berre lær åt spjot som susar.

²¹På buken sit det kvasse broddar, han lagar far i søyla som ein treskjeslede.

²²Han fær djupet til å koka som ei gryta, og havet til å skuma som ein salvekjel.

²³Stigen hans lyser etter han; djupet ser ut som det hev sylvhår.

²⁴På jord finst ingen ting som meistrar han; skapt er han til å vera utan reddhug.

²⁵Alt som er høgt, ser han i auga; han er ein konge yver alle stolte dyr.