Read nynorsk 1938 Job 42 Bible Online

Job 42 - nynorsk 1938 bible

Job 42

¹Då svara Job Herren og sa:

²Eg veit at allting maktast du; for deg er ingen plan umogleg.

³Kven er vel han som gjer di rådgjerd myrk i fåvit? Difor: Um det eg ikkje hadde vit på, tala eg, um det som var for underfullt for meg, og som eg ikkje skyna.

⁴Men høyr no du, so vil eg tala! So vil eg spyrja deg og du skal læra meg.

⁵Eg hadde berre høyrt ei fråsegn um deg; no hev mitt auga fenge sjå deg.

⁶Alt tek eg difor i meg att og tregar djupt i mold og oska.

⁷Då no Herren hadde tala desse ordi til Job, sa han til Elifas frå Teman: Harmen min hev loga upp mot deg og dei tvo venene dine; for de hev ikkje tala rett um meg, soleis som Job, tenaren min.

⁸Tak difor sju uksar og sju verar og gakk til Job, tenaren min, og ofra dei til brennoffer for dykk! Og Job, tenaren min, skal beda for dykk; berre hans bøner vil eg høyra, so eg ikkje gjer med dykk som de hev fortent, uvituge som de er; for de hev ikkje tala rett um meg, soleis som Job, tenaren min.

⁹So gjekk Elifas frå Teman og Bildad frå Suah og Sofar frå Na'ama og gjorde so som Herren hadde sagt til dei; og Herren høyrde Jobs bøn.

¹⁰Då no Job bad for venene sine, gjorde Herren ende på ulukka hans; og alt det Job hadde ått, gav Herren han tvifald att.

¹¹Og alle brørne hans kom til han, og like eins alle systerne hans og alle kjenningane han fyrr hadde havt, og dei åt med han i huset hans og synte han medynk og trøysta han for all ulukka som Herren hadde late koma yver han; og kvar av dei gav honom ein kesite og ein gullring. /[57]

¹²Og Herren velsigna den siste levetidi åt Job meir enn den fyrste; han fekk fjortan tusund sauer og seks tusund kamelar og tusund par uksar og tusund asnor. /[58]

¹³Og han fekk sju søner og tri døtter.

¹⁴Den eine dotteri kalla han Jemima, den andre Kesia og den tridje Keren-Happuk.

¹⁵Det fanst ikkje so vene kvinnor i heile landet som døtterne åt Job; og far deira let dei erva til liks med brørne deira.

¹⁶Sidan levde Job hundrad og fyrti år og fekk sjå sine born og barneborn i fjorde leden.

¹⁷Og Job døydde, gamal og mett av dagar.