Read nynorsk 1938 Job 5 Bible Online

Job 5 - nynorsk 1938 bible

Job 5

¹Rop berre du! Finst det nokon som svarar deg? Og kven av dei heilage vil du venda deg til?

²For harm slær dåren i hel, og vreide drep den fåvituge.

³Eg såg ein dåre røta seg, men brått laut eg banna hans bustad.

⁴Borni hans var utan hjelp; dei vart trakka ned i porten, og ingen berga dei.

⁵Dei svoltne åt upp avlingi hans, dei tok henne trass i klungergjerde, og snara lurde på hans gods.

⁶For ikkje skyt ulukka upp or moldi, og møda brydder ikkje fram or jordi;

⁷men mennesket vert født til møda, som gneistane flyg høgt i veret.

⁸Eg vilde venda meg til Gud og leggja saki i hans hand, /[4]

⁹han som gjer uransakelege storverk, so mange under at dei kann 'kje teljast,

¹⁰som sender regn utyver jordi, let vatnet strøyma yver mark og eng,

¹¹som lyfter småfolk upp i høgdi og hjelper syrgjande til frelsa,

¹²som spiller rådene dei kloke legg, so deira hender ikkje fær gjort verk som varer,

¹³som fangar vise folk i deira klokskap og gjer det so at sløge råder vert forhasta;

¹⁴um dagen støyter dei på myrker, og trivlar midt på dag som var det natt.

¹⁵Slik frelser han den fatige frå sverdet, frå deira munn og handi åt den sterke,

¹⁶so det vert von for vesalmannen, og vondskapen let munnen att.

¹⁷Ja, sælt er det menneske som Gud refser, og tukt frå den Allmektige må du ikkje vanvyrda!

¹⁸For han sårar, og han fetlar; han slær og hans hender lækjer.

¹⁹I seks trengslor skal han berga deg, og i den sjuande kjem inkje vondt innåt deg.

²⁰I hungersnaud friar han deg frå dauden og i krig frå det herjande sverdet.

²¹For tungesvipa skal du vera gøymd, og ikkje tarv du ottast øydingi.

²²Øyding og hunger skal du læ åt, og villdyri på jordi tarv du ikkje ottast;

²³for steinane på marki hev du samband med, og villdyri i heidi held fred med deg.

²⁴Du fær sjå at ditt tjeld stend trygt, og skodar du din eigedom, saknar du ingen ting.

²⁵Du får sjå at ætti di aukar, dine etterkomarar vert som urtene på jordi.

²⁶I fullmogen alder skal du ganga i gravi, liksom kornband vert berga i rette tid.

²⁷Sjå, dette hev me granska ut, og soleis er det. So høyr det då og merk deg det!