Read nynorsk 1938 Job 7 Bible Online

Job 7 - nynorsk 1938 bible

Job 7

¹Eit hermannsliv er livet åt ein mann på jordi, hans dagar er som dagane åt leigekaren.

²Liksom ein træl som lengtar etter skugge, og lik ein leigekar som ventar på si løn,

³so fekk eg månader med naud i eige, og mødefulle næter vart min lut.

⁴Eg segjer når eg gjeng til kvile: Når skal eg då få standa upp? Og lang vert kvelden, og eg trøytnar av di eg ligg uroleg alt til dagsprett.

⁵Min kropp er klædd med makk og skitne skorper, og hudi skrukkast og bryt upp att.

⁶Mi tid fer snøggare enn skutelen og kverv burt utan nokor von.

⁷Kom i hug: Mitt liv er som ein pust; mitt auga fær ikkje sjå lukka meir.

⁸Den som no ser meg, skal ikkje få auga på meg meir; når augo dine leitar etter meg, so finst eg ikkje lenger.

⁹Ein skydott kverv og fer sin veg; so er det og med den som fer til helheim - han kjem ikkje attende derifrå,

¹⁰han vender ikkje heim att til sitt hus, og staden hans veit ikkje av han meir.

¹¹Difor vil eg no ikkje leggja band på munnen, men tala i min djupe hugverk og klaga i mi såre sjelenaud.

¹²Er eg eit hav eller eit sjøtroll, med di du set ut vakt imot meg?

¹³Eg tenkjer: Eg finn trøyst i sengi, mitt lægje lettar nok mi sut -

¹⁴då skræmer du meg upp med draumar og støkkjer meg med ville syner,

¹⁵so sjeli mi vil heller verta kjøvd - ja, heller døy enn vera slik ei beingrind!

¹⁶Eg er leid av dette; eg lever ikkje æveleg; lat meg vera, for mine dagar er ein pust.

¹⁷Kva er vel mannen, at du vyrder han so mykje og retter dine tankar på han,

¹⁸at du heimsøkjer han kvar morgon og prøver han kvar augneblink?

¹⁹Kor lenge skal det vara fyrr du vender augo frå meg? Vil du då ikkje sleppa meg til eg fær svelgja råken?

²⁰Hev eg gjort synd, kva gjorde eg då deg, du som på mannen vaktar? Kvi hev du valt meg ut til skiva, so eg no er meg sjølv ei byrd?

²¹Kvi gjev du ikkje brotet til og tek misgjerningi mi burt? For no lyt eg snart leggja meg i moldi, og når du leitar, er eg ikkje meir.