Read nynorsk 1938 Job 8 Bible Online

Job 8 - nynorsk 1938 bible

Job 8

¹Då tok Bildad frå Suah til ords og sa:

²Kor lenge vil du tala so og lata ordi rasa som eit uver?

³Trur du at Gud kann rengja retten? Kann den Allmektige vel rengja rettferd?

⁴Hev dine søner synda mot han, gav han dei deira synd i vald.

⁵I fall du vender deg til Gud, og bed du allmakts Gud um nåde,

⁶er du då rein og utan svik, so skal han vaka yver deg og reisa ny din rettferds-bustad,

⁷og lukka som du åtte fyrr, skal verta ring mot den som kjem; for ho skal vera ovleg stor.

⁸For berre spør dei farne ætter, og akta på kva federne fann ut

⁹- for me er frå i går, og inkje veit me; for livet vårt på jordi er ein skugge -

¹⁰dei skal nok læra deg og gjeva fråsegn og svara deg med ord frå hjarta.

¹¹Veks sevet anna enn i myr? Trivst storren der som vatnet vantar?

¹²Enn stend han grøn, og ingen skjer han; då visnar han fyrr noko anna gras.

¹³So gjeng det alle dei som gløymer Gud, og voni glepp for gudlaus mann;

¹⁴avskore vert det som han set si lit til, og det han stolar på, er kongurvev.

¹⁵Han styd seg på sitt hus - det dett; han held seg fast i det, men det stend ustødt.

¹⁶Han stend der full av saft i solskinet, hans greiner breider seg utyver hagen;

¹⁷hans røter smett seg kring ei steinrøys, han bryt seg fram imillom steinar.

¹⁸Men vert han riven frå sin stad, so kjennest staden ikkje ved han, men segjer: Eg hev aldri set deg.

¹⁹Sjå, det er gleda på hans veg, og upp or moldi brydder andre.

²⁰Nei, Gud skyt ikkje frå seg ein som er ulastande, og han tek ikkje gudlaust folk i handi.

²¹Han skal nok endå fylla munnen din med lått og lippone med fagnadrop.

²²Men dei som hatar deg, skal skammi klæda, og tjeldi åt dei gudlause skal ikkje finnast meir.