Read nynorsk 1938 Salmane 10 Bible Online

Salmane 10 - nynorsk 1938 bible

Salmane 10

¹Herre, kvi stend du so langt undan, løyner di åsyn dei tider me er i trengd?

²Ved ovmodet hjå den ugudlege illhugast dei arme; dei vert fanga i dei meinråder han hev tenkt upp.

³For den ugudlege rosar det hans sjel lyster, og den vinnekjære byd farvel og spottar Herren.

⁴Den ugudlege set nosi høgt og segjer: Han heimsøkjer ikkje. Det er ingen Gud til, det er alle hans tankar.

⁵Hans vegar lukkast alle tider; langt burte frå han i det høge er dine domar; alle sine motstandarar - dei blæs han åt.

⁶Han segjer i sitt hjarta: Eg skal ikkje verta rikka, frå ættled til ættled kjem eg ikkje i ulukka.

⁷Hans munn er full av forbanning og av svik og vald; under hans tunga er tjon og ulukka.

⁸Han ligg på lur ved gardane, på løynlege stader myrder han den saklause, hans augo speiar etter stakkaren.

⁹Han lurer i løyne som løva i si kjørr, han lurer etter å gripa den arme; han grip den arme, med di han dreg han inn i sitt garn.

¹⁰Han luter seg, duvar seg ned, og stakkaren fell for hans sterke klør.

¹¹Han segjer i sitt hjarta: Gud hev gløymt det, han hev løynt si åsyn, han ser det aldri.

¹²Statt upp, Herre! Gud, lyft upp di hand, gløym ikkje dei arme!

¹³Kvi skal den ugudlege vanvyrda Gud og segja i sitt hjarta: Du heimsøkjer ikkje?

¹⁴Du hev set det; for du skodar naud og hjartesorg til å leggja dei i di hand; til deg yvergjev den verjelause si sak, du er ein hjelpar for dei farlause.

¹⁵Slå armen sund på den ugudlege, og den vonde - heimsøk hans gudløysa, so du ikkje finn henne meir!

¹⁶Herren er konge æveleg og alltid; heidningane vert øydde ut or hans land!

¹⁷Herre, du høyrer ynsket frå dei arme. Du styrkjer deira hjarta, du vender øyra ditt til

¹⁸og gjev den som er farlaus og trælka, sin rett. Ikkje lenger skal mennesket, som er av jordi, halda fram med å skræma.