Read nynorsk 1938 Salmane 101 Bible Online

Salmane 101 - nynorsk 1938 bible

Salmane 101

¹Av David; ein salme. / Um miskunn og rett vil eg syngja; deg, Herre, vil eg lova.

²Eg vil akta på vegen den ulastande gjeng - når kjem du til meg? Eg vil ferdast i mitt hjartans uskyld i mitt hus.

³Eg vil ikkje setja meg fyre noko nidingsverk; å gjera misgjerd hatar eg, slikt skal ikkje hanga ved meg.

⁴Eit rangsnutt hjarta skal vika frå meg, den vonde vil eg ikkje vita av.

⁵Den som løynleg lastar sin næste, han vil eg tyna; den som hev stolte augo og eit ovmodigt hjarta, kann eg ikkje tola.

⁶Mine augo ser etter dei gudlege i landet, for eg vil dei skal bu hjå meg; den som ferdast på vegen åt den ulastande, han skal tena meg.

⁷I mitt hus skal ingen få bu som fer med svik; den som talar lygn, skal ikkje standa for augo mine.

⁸Kvar morgon vil eg tyna alle ugudlege i landet, so eg kann rydja ut or Herrens by alle ugjerningsmenner.