Read nynorsk 1938 Salmane 102 Bible Online

Salmane 102 - nynorsk 1938 bible

Salmane 102

¹Bøn av ein arming, når han ormektast og let sitt klagemål strøyma fram for Herren.

²Herre, høyr mi bøn, og lat mitt rop koma fram til deg!

³Løyn ikkje ditt andlet for meg den dagen eg er i naud! Halla øyra ditt til meg! Den dagen eg ropar, svara meg snart!

⁴For dagane mine hev fare burt som ein røyk, og mine bein er brende som ein brand.

⁵Mitt hjarta er solstukke som gras og uppturka; for eg hev gløymt å eta brødet mitt.

⁶For mi høgmælte stynjing skuld heng beini fast ved kjøtet mitt.

⁷Eg likjest pelikanen i øydemarki, eg er som ula på aude stader.

⁸Eg ligg vaken og er vorten som ein einsleg fugl på taket.

⁹Heile dagen spottar mine fiendar meg; dei som reint er ville mot meg, sver ved meg. /[90]

¹⁰For eg et oska som brød, og drykken min blandar eg med gråt

¹¹for din vreide og din harm skuld; for du hev lyft meg upp og kasta meg burt.

¹²Mine dagar er som ein skugge når han lengjest, og sjølv visnar eg som gras.

¹³Men du, Herre, tronar i all æva, og ditt minne varer frå ætt til ætt.

¹⁴Du vil standa upp, du vil miskunna Sion; for det er tid til å vera nådig mot henne, ja, timen er komen.

¹⁵For dine tenarar hev godhug for steinane hennar, og dei ynkast yver hennar grus.

¹⁶Og heidningane skal ottast Herrens namn, og alle kongar på jordi din herlegdom.

¹⁷For Herren hev bygt upp att Sion, han hev synt seg i sin herlegdom.

¹⁸Han hev vendt seg til bøni frå dei hjelpelause, og han hev ikkje vanvyrdt deira bøn.

¹⁹Dette skal verta uppskrive for den komande ætti, og det folket som vert skapt, skal lova Herren.

²⁰For han hev set ned frå sit heilage høgd, Herren hev frå himmelen skoda ned på jordi

²¹og vil høyra sukken frå den bundne og løysa daudens born,

²²so dei i Sion skal forkynna Herrens namn og hans pris i Jerusalem,

²³når folkeslag og kongerike kjem i hop og vil tena Herren.

²⁴Han hev bøygt mi kraft på vegen, han hev korta av mine dagar.

²⁵Eg segjer: Min Gud, tak meg ikkje burt midt i mine dagar! Frå ætt til ætt varer dine år.

²⁶Fordom grunnfeste du jordi, og himlane er verk av dine hender.

²⁷Dei skal forgangast, men du stend; alle skal dei eldast som eit klæde, som ein klædnad skifter du dei, og dei vert umskifte;

²⁸men du er den same, og dine år tek aldri ende.

²⁹Borni åt dine tenarar skal bu i ro, og deira avkjøme skal standa trygt for di åsyn.