Read nynorsk 1938 Salmane 103 Bible Online

Salmane 103 - nynorsk 1938 bible

Salmane 103

¹Av David. / Lova Herren, mi sjel, og alt som i meg er, love hans heilage hamn!

²Lova Herren, mi sjel, og gløym ikkje alle hans velgjerningar!

³Han som tilgjev all di skuld, som lækjer alle dine sjukdomar,

⁴han som løyser ditt liv frå gravi, han som kryner deg med nåde og miskunn,

⁵han som mettar di sjel med det som godt er, so du vert ung att som ørnen. /[91][92]

⁶Herren gjer rettferdsverk og rett mot alle som er trælka.

⁷Han kunngjorde sine vegar for Moses, sine gjerningar for Israels born.

⁸Miskunnsam og nådig er Herren, langmodig og rik på miskunn.

⁹Han trettar ikkje alltid og gøymer ikkje æveleg på vreide.

¹⁰Han gjer ikkje med oss etter våre synder og gjev oss ikkje det me er verde for våre misgjerningar.

¹¹For so høg som himmelen er yver jordi, so er hans miskunn veldig yver dei som ottast han.

¹²So langt som aust er frå vest, let han våre misgjerningar vera burte frå oss.

¹³Som ein far miskunnar borni sine, so miskunnar Herren dei som ottast han.

¹⁴For han veit kva slag skapning me er, han kjem i hug at me er dust.

¹⁵Eit menneske, som graset er hans dagar; som blomen på marki, soleis blømer han.

¹⁶Når vinden fer yver han, er han ikkje meir, og staden hans veit ikkje meir av han.

¹⁷Men Herrens miskunn er frå æva og til æva yver dei som ottast han, og hans rettferd er mot barneborn,

¹⁸mot dei som held hans pakt, og som kjem i hug hans fyresegner, so dei lever etter dei.

¹⁹Herren hev reist sin kongsstol i himmelen, og hans rike råder yver alle ting.

²⁰Lova Herren, de hans englar, de veldige kjempor, som set hans ord i verk, med di de lyder røysti av hans ord!

²¹Lova Herren, alle hans herar, de hans tenarar som gjer hans vilje!

²²Lova Herren, alle hans verk, på alle stader i hans rike! Lova Herren mi sjel!