Read nynorsk 1938 Salmane 108 Bible Online

Salmane 108 - nynorsk 1938 bible

Salmane 108

¹Ein song, ein salme av David.

²Mitt hjarta er roleg, Gud! Eg vil syngja og lovsyngja, ja, det skal mi æra. /[104]

³Vakna, harpa og citar! Eg vil vekkja morgonroden.

⁴Eg vil prisa deg millom folki, Herre, eg vil lovsyngja deg millom folkeslagi.

⁵For di miskunn er stor yver himmelen, og din truskap til dei høge skyer.

⁶Gud, syn deg høg yver himmelen, og di æra yver heile jordi!

⁷For at dei du elskar må verta frelste, so hjelp med di høgre hand og bønhøyr oss!

⁸Gud hev tala i sin heilagdom. Eg vil fagna meg; eg vil skifta ut Sikem, og Sukkotdalen vil eg mæla.

⁹Meg høyrer Gilead til, meg høyrer Manasse til, og Efra'im er vern for mitt hovud, Juda er min styrarstav.

¹⁰Moab er mitt vaskefat, på Edom kastar eg skoen min, for Filistarland set eg i med fagnadrop.

¹¹Kven vil føra meg til den faste byen? Kven leider meg til Edom?

¹²Er det ikkje du, Gud, du som støytte oss burt, du, Gud, som ikkje drog ut med våre herar?

¹³Gjev oss hjelp mot fienden! for mannehjelp er fåfengd.

¹⁴Med Guds hjelp skal me gjera storverk, og han skal trakka ned våre fiendar.