Read nynorsk 1938 Salmane 115 Bible Online

Salmane 115 - nynorsk 1938 bible

Salmane 115

¹Ikkje oss, Herre, ikkje oss, men ditt namn gjeve du æra for di miskunn, for din truskap skuld!

²Kvifor skal heidningane segja: Kvar er no deira Gud?

³Vår Gud er då i himmelen; alt det han vil, det gjer han.

⁴Deira avgudar er sylv og gull, eit verk av mannehender.

⁵Dei hev munn, men talar ikkje; dei hev augo, men ser ikkje;

⁶dei hev øyro, men høyrer ikkje; dei hev nos, men luktar ikkje.

⁷Med sine hender kjenner dei ikkje, med sine føter gjeng dei ikkje; dei hev ikkje mål i strupen.

⁸Som dei sjølve er, vert dei som lagar dei, alle som set si lit til dei.

⁹Israel, lit på Herren! Han er deira hjelp og skjold.

¹⁰Arons hus, lit på Herren! Han er deira hjelp og skjold.

¹¹De som ottast Herren, lit på Herren! Han er deira hjelp og skjold.

¹²Herren kom oss i hug; han skal velsigna, han skal velsigna Israels hus, han skal velsigna Arons hus,

¹³han skal velsigna dei som ottast Herren, dei små med dei store.

¹⁴Herren late dykk aukast, dykk og dykkar born!

¹⁵Velsigna vere de av Herren, han som skapte himmel og jord!

¹⁶Himmelen er Herrens himmel, men jordi hev han gjeve mannsborni.

¹⁷Dei daude lovar ikkje Herren, ingen av dei som stig ned i helheims-stilla.

¹⁸Men me skal lova Herren frå no og til æveleg tid. Halleluja!