Read nynorsk 1938 Salmane 132 Bible Online

Salmane 132 - nynorsk 1938 bible

Salmane 132

¹Ein song til høgtidsferdene. / Herre, gjev David løn for all hans møda,

²han som svor for Herren, lova Jakobs Veldige:

³Eg gjeng ikkje inn i mitt heimetjeld, eg stig ikkje upp på lega i mi seng,

⁴eg unner ikkje augo svevn, ikkje augneloki ein blund,

⁵fyrr eg finn ein stad for Herren, ein bustad for Jakobs Veldige.

⁶Sjå, me høyrde um henne i Efrata, me fann henne i skogbygdi. /[112][113][114]

⁷Lat oss ganga til hans bustad, lat oss tilbeda for hans fotskammel!

⁸Statt upp, Herre, og kom til din kvilestad, du og ditt veldes kista!

⁹Lat prestane dine klæda seg i rettferd og dine trugne ropa med fagnad!

¹⁰For David, din tenars skuld vis ikkje frå deg åsyni åt den du hev salva!

¹¹Herren hev svore David ein sann eid, den gjeng han ikkje ifrå: Av di livsfrukt vil eg setja kongar på din stol;

¹²dersom borni dine held mi pakt og mine vitnemål, som eg skal læra dei, so skal og deira born æveleg og alltid sitja på din kongsstol.

¹³For Herren hev valt seg Sion, ynskt seg det til bustad:

¹⁴Dette er min kvilestad for all tid; her vil eg bu, for det hev eg ynskt.

¹⁵Maten her vil eg rikleg signa, dei fatige vil eg metta med brød,

¹⁶og prestane vil eg klæda med frelsa, og dei gudlege skal ropa høgt av fagnad.

¹⁷Der vil eg lata veksa upp eit horn for David, stella til ei lampa for den eg hev salva.

¹⁸Hans fiendar vil eg klæda med skam, men på han skal hans kruna stråla.