Read nynorsk 1938 Salmane 135 Bible Online

Salmane 135 - nynorsk 1938 bible

Salmane 135

¹Halleluja! Lova Herrens namn, lova, de Herrens tenarar,

²de som stend i Herrens hus, i fyregardane til vår Guds hus!

³Lova Herren! for Herren er god, syng lov for hans namn! for det er ljuvleg.

⁴For Herren hev valt seg ut Jakob, Israel til sin eigedom.

⁵Eg veit at Herren er stor, og vår Herre er større enn alle gudar.

⁶Herren gjer alt det han vil i himmelen og på jordi, i havi og i alle djup,

⁷han som let regnskyer stiga upp frå enden av jordi, gjer eldingar til regn, fører vind ut or sine gøymslor,

⁸han som slo dei fyrstefødde i Egyptarland, både av folk og fe,

⁹som sende teikn og under midt i deg, Egyptarland, mot Farao og alle hans tenarar,

¹⁰han som slo mange heidningfolk og drap mektige kongar,

¹¹Sihon, amoritarkongen, og Og, Basan-kongen, og alle Kana'ans kongerike,

¹²og gav deira land til arv, til arv for Israel, sitt folk.

¹³Herre, ditt namn varer æveleg, Herre, ditt minne frå ætt til ætt.

¹⁴For Herren skal døma sitt folk, og sine tenarar skal han miskunna.

¹⁵Heidninge-avgudane er sylv og gull, eit verk av mannehender.

¹⁶Dei hev munn, men talar ikkje; dei hev augo, men ser ikkje;

¹⁷dei hev øyro, men høyrer ikkje, og det er ingen ande i deira munn.

¹⁸Som dei sjølve er, vert dei som lagar dei, alle som set si lit til dei.

¹⁹Israels hus, lova Herren! Arons hus, lova Herren!

²⁰Levis hus, lova Herren! De som ottast Herren, lova Herren!

²¹Lova vere Herren frå Sion, han som bur i Jerusalem! Halleluja!