Read nynorsk 1938 Salmane 140 Bible Online

Salmane 140 - nynorsk 1938 bible

Salmane 140

¹Til songmeisteren; ein salme av David.

²Herre, berga meg frå vonde folk, vakta meg for valdsmenner,

³som tenkjer ut vondt i hjarta, som kvar dag samlar seg til strid!

⁴Dei kvesser tunga si som ein orm, ormeeiter er under lippone deira. Sela.

⁵Vara meg, Herre, for hendene åt ugudlege folk, vakta meg for valdsmenner, som tenkjest til å få mine føter til fall!

⁶Ovmodige folk hev lagt løynde fellor og reip for meg, dei hev strakt garn attmed vegen, dei hev sett snaror for meg. Sela.

⁷Eg segjer til Herren: Du er min Gud; lyd, Herre, på mi bønerøyst!

⁸Herren, Israels Gud, er mi sterke frelsa; du vernar mitt hovud på væpningsdagen.

⁹Herre, lat ikkje den ugudlege få det han ynskjer, lat ikkje hans meinråd få framgang! Elles kom dei til å upphøgja seg. Sela.

¹⁰Yver hovudet på dei som kringset meg, skal den ulukka koma som deira lippor valdar.

¹¹Glør skal ein rista ned yver dei; i elden skal han kasta dei, i djupe vatn, so dei ikkje kann reisa seg.

¹²Ein munnkåt mann skal ikkje standa lenge i landet; den vonde valdsmannen skal han jaga med slag på slag.

¹³Eg veit at Herren skal greida saki for armingen og hjelpa dei fatige so dei fær rett.

¹⁴Ja, dei rettferdige skal prisa ditt namn, dei ærlege skal bu for di åsyn.