Read nynorsk 1938 Salmane 144 Bible Online

Salmane 144 - nynorsk 1938 bible

Salmane 144

¹Av David. / Lova vere Herren, mitt berg, han som lærer upp mine hender til strid, mine fingrar til krig,

²mi miskunn og mi festning, mi borg og min bergar, min skjold og den eg flyr til, han som tvingar mitt folk under meg.

³Herre, kva er ein mann, at du kjenner han, eit mannsbarn, at du aktar på det?

⁴Mannen likjest ein pust, hans dagar er som ein kvervande skugge.

⁵Herre, bøyg din himmel og stig ned, rør du fjelli so dei ryk!

⁶Lat ljonet lyna og spreid dei, send dine piler og skræm dei! /[118]

⁷Rett hendene ned frå det høge, fria meg og frels meg frå dei store vatni, frå handi åt framande,

⁸dei som talar svik med munnen sin, og høgre handi deira er ei lygne-hand.

⁹Gud, ein ny song vil eg syngja deg, til tistrengs-harpa vil eg syngja deg lov,

¹⁰du som gjev kongane frelsa, som bergar David, tenaren din, frå det vonde sverdet.

¹¹Frels meg og fria meg frå handi åt framande, dei som talar svik med munnen sin, og høgre handi deira er ei lygne-hand,

¹²so våre søner kann vera i sin ungdom som høgvaksne vokstrar, våre døtter som hyrnestolpar, hogne som til eit slott,

¹³so våre bur kann vera fulle og gjeva av alle slag, so våre sauer kann auka seg i tusundtal, ja i titusund-tal på våre marker,

¹⁴so våre kyr kann hava kalv, so det ingen skade må vera og inkje tap og inkje klagerop på våre gator.

¹⁵Sælt er det folk som hev det soleis; sælt er det folk som hev Herren til Gud.