Read nynorsk 1938 Salmane 145 Bible Online

Salmane 145 - nynorsk 1938 bible

Salmane 145

¹Ein lovsong av David. / Eg vil upphøgja deg, min Gud, du som er kongen, og eg vil lova namnet ditt æveleg og alltid.

²Kvar dag vil eg lova deg, og eg vil prisa namnet ditt æveleg og alltid.

³Herren er stor og mykje lovsungen, og hans storvelde er uransakeleg.

⁴Ei ætt skal lova dine verk for ei onnor, og dine storverk skal dei forkynna.

⁵Di høge og herlege æra og dine underverk vil eg grunda på.

⁶Og um dine sterke og skræmelege gjerningar skal dei tala, og dine storverk vil eg fortelja um.

⁷Minneord um din store godleik skal dei lata strøyma ut og syngja med fagnad um di rettferd.

⁸Herren er nådig og miskunnsam, langmodig og stor i miskunn.

⁹Herren er god imot alle, og han miskunnar alle sine verk.

¹⁰Alle dine verk skal prisa deg, Herre, og dine trugne skal lova deg.

¹¹Um herlegdomen i ditt rike skal dei tala, og um ditt velde skal dei fortelja,

¹²so mannsborni skal få vita um dine veldige verk og den strålande herlegdomen i ditt rike.

¹³Ditt rike er eit rike for alle ævor, og ditt herredøme varer gjenom alle ætter.

¹⁴Herren styd alle dei som fell, og reiser alle som er nedbøygde.

¹⁵Alle vender augo sine ventande til deg, og du gjev dei deira føda i si tid.

¹⁶Du let upp handi og mettar alt levande med hugnad. /[119]

¹⁷Herren er rettferdig i alle sine vegar og miskunnsam i alle sine verk.

¹⁸Herren er nær hjå alle dei som kallar på han, hjå alle som kallar på han i sanning.

¹⁹Han gjer etter deira ynske som ottast han, og han høyrer deira rop og frelser dei.

²⁰Herren varar alle dei som elskar han; men alle ugudlege tyner han.

²¹Min munn skal mæla um Herrens pris, og alt kjøt skal lova hans heilage namn æveleg og alltid.