Read nynorsk 1938 Salmane 147 Bible Online

Salmane 147 - nynorsk 1938 bible

Salmane 147

¹Lova Herren! For det er godt å lovsyngja vår Gud, ljuvleg er det, lovsong høver vel.

²Herren byggjer upp Jerusalem, han samlar dei burtdrivne israelitar.

³Han lækjer dei som hev eit sundbrote hjarta, og bind um deira verkjande sår.

⁴Han set tal på stjernone, han gjev dei alle namn.

⁵Vår Herre er stor og veldig i makt; på hans vit er det ikkje mål.

⁶Herren held dei spaklyndte uppe, dei ugudlege bøygjer han ned til jordi.

⁷Svara Herren med takkesong, syng lov for vår Gud med citar,

⁸han som breider skyer yver himmelen, han som lagar regn for jordi, han som let det veksa gras på fjelli.

⁹Han gjev feet fôr, ramn-ungane som ropar.

¹⁰Han hev ikkje hug til hestens styrke, han hev ikkje hugnad i mannsens legger.

¹¹Herren hev hugnad i dei som ottast han, dei som ventar på hans miskunn.

¹²Jerusalem, prisa Herren, Sion, lova din Gud!

¹³For han hev gjort dine portstenger faste, han hev velsigna dine born i deg.

¹⁴Det er han som gjev dine grensor fred, mettar deg med den beste kveite.

¹⁵Det er han som sender sin tale til jordi; ovsnøgt spring hans ord.

¹⁶Det er han som gjev snø som ull, strår ut rim som oska.

¹⁷Han kastar sin is som småe stykke; kven kann standa for hans kulde?

¹⁸Han sender sitt ord og smeltar dei; han let vinden sin blåsa, då renn vatn.

¹⁹Han kunngjorde sitt ord for Jakob, sine bod og sine lover for Israel.

²⁰Soleis hev han ikkje gjort med noko heidningfolk, og lover kjenner dei ikkje. Halleluja! /[120]