Read nynorsk 1938 Salmane 148 Bible Online

Salmane 148 - nynorsk 1938 bible

Salmane 148

¹Halleluja! Lova Herren frå himmelen, lova han i det høge!

²Lova han, alle hans englar, lova han, all hans her!

³Lova han, sol og måne, lova han, alle lysande stjernor!

⁴Lova han, de himle-himlar og de vatn som er uppyver himlane!

⁵Dei skal lova Herrens namn; for han baud, og dei vart skapte,

⁶og han sette dei på staden deira for alltid og æveleg, han gav ei lov som ingen av dei bryt.

⁷Lova Herren frå jordi, de store sjødyr og alle djup,

⁸eld og hagl, snø og eim, du storm, som set hans ord i verk,

⁹de fjell og alle haugar, aldetre og alle sedrar,

¹⁰de villdyr og alt fe, krekande dyr og fljugande fuglar,

¹¹de kongar på jordi og alle folk, de hovdingar og alle domarar på jordi,

¹²de unge gutar og gjentor, de gamle med dei unge!

¹³Dei skal lova Herrens namn; for berre hans namn er høgt, hans herlegdom er yver jord og himmel,

¹⁴og han hev lyft upp eit horn for sitt folk til ein lovsong for alle sine trugne, for Israels born, det folk som er han nær. Halleluja!