Read nynorsk 1938 Salmane 17 Bible Online

Salmane 17 - nynorsk 1938 bible

Salmane 17

¹Ei bøn av David. / Herre, høyr på rettvis sak, lyd etter mitt rop, vend øyra til mi bøn frå sviklause lippor!

²Lat min rett ganga ut frå di åsyn, dine augo skoda kva rett er!

³Du hev prøvt mitt hjarta, gjesta det um natti, du hev ransaka meg, du fann ingen ting; min munn vik ikkje av frå mine tankar.

⁴Mot det som menneske hev gjort meg, hev eg etter ordet frå dine lippor teke meg i vare for valdsmanns stigar.

⁵Mine fet heldt seg stødt til dine farvegar, mine steg var ikkje utstøde.

⁶Eg ropar til deg, for du svarar meg, Gud! Halla øyra ditt til meg, høyr mitt ord!

⁷Vis miskunn med underfulle verk, du som med di høgre hand frelser dei som flyr til deg, frå dine motstandarar!

⁸Vakta meg som din augnestein, gøym meg i skuggen av dine venger

⁹for dei ugudlege som øydelegg meg, mine fiendar til dauden, som kringset meg!

¹⁰Dei let sitt feite hjarta att, med sin munn talar dei i ovmod.

¹¹Kvar me gjeng, kringgjeng dei meg no; sine augo set dei på å støyta meg ned til jordi.

¹²Han er lik ei løva som stundar etter å riva sund, og ei ungløva som ligg i løyne.

¹³Statt upp, Herre, stig fram imot han, støyt han ned, frels mi sjel frå den ugudlege med ditt sverd,

¹⁴frå menneski med di hand, frå menneski av denne verdi, som hev sin lut i dette liv, og som du fyller buken på med dine skattar, dei som er rike på søner og let sine leivner etter seg til sine born!

¹⁵Eg skal i rettferd skoda di åsyn, eg skal, når eg vaknar, mettast av din skapnad.