Read nynorsk 1938 Salmane 21 Bible Online

Salmane 21 - nynorsk 1938 bible

Salmane 21

¹Til songmeisteren; ein salme av David.

²Herre! Kongen gled seg yver di makt, og kor høgt han fagnar seg yver di frelsa!

³Det hans hjarta ynskte, hev du gjeve han, og ikkje neitta han det hans lippor bad um. Sela.

⁴For du kom han til møtes med velsigning og lukka; du sette ei kruna av gull på hans hovud.

⁵Han bad deg um livet; du gav han det, eit langt liv, æveleg og alltid.

⁶Stor er hans æra ved di frelsa; høgd og heider legg du på han.

⁷For du set han til velsigning for alle tider, du hugnar han med gleda for di åsyn.

⁸For kongen set si lit til Herren, og ved miskunn frå den Høgste skal han ikkje verta rikka.

⁹Di hand skal finna alle dine fiendar, di høgre hand skal finna dei som hatar deg.

¹⁰Du skal gjera dei som ein gloande omn når du viser di åsyn; Herren skal tyna dei i sin vreide, og eld skal øyda dei.

¹¹Deira frukt skal du rydja ut av jordi, og deira avkjøme millom mannsborni.

¹²For dei hev stila på vondt imot deg, dei hev lagt upp meinråder; dei skal ingen ting maktast.

¹³For du skal få dei til å snu ryggen til; med dine bogestrenger siktar du på deira andlet.

¹⁴Reis deg, Herre, i di makt! Me vil lovsyngja og prisa ditt storverk.