Read nynorsk 1938 Salmane 24 Bible Online

Salmane 24 - nynorsk 1938 bible

Salmane 24

¹Av David, ein salme. / Jordi høyrer Herren til - og alt det som fyller henne, jordriket og dei som bur der.

²For han hev grunnlagt henne på hav og grunnfest henne på strøymande vatn.

³Kven skal stiga upp på Herrens fjell, og kven skal standa på hans heilage stad?

⁴Den som hev skuldlause hender og reint hjarta, som ikkje hev vendt sin hug til lygn og ikkje svore med svik.

⁵Han skal få velsigning frå Herren og rettferd frå Gud, sin frelsar.

⁶Dette er deira ætt som spør etter han, dei som søkjer di åsyn, Jakobs born. Sela.

⁷De portar, lyft upp dykkar hovud, ja lyft dykk upp, de ævelege dører, so kongen den herlege kann koma inn!

⁸Kven er kongen den herlege? Herren sterk og veldig, Herren veldig i strid.

⁹De portar, lyft upp dykkar hovud, ja lyft dykk upp, de ævelege dører, so kongen den herlege kann koma inn!

¹⁰Kven er då kongen den herlege? Herren, allhers Gud, han er kongen den herlege. Sela.