Read nynorsk 1938 Salmane 25 Bible Online

Salmane 25 - nynorsk 1938 bible

Salmane 25

¹Av David. / Herre, til deg lyfter eg mi sjel.

²Min Gud, til deg hev eg sett mi lit; lat meg ikkje verta til skammar, lat ikkje mine fiendar gilda seg yver meg!

³Ja, ingen av dei som ventar på deg, skal verta til skammar; men dei skal verta til skammar som utan årsak bryt si tru.

⁴Herre, lat meg kjenna dine vegar, lær meg dine stigar!

⁵Leid meg fram i din truskap og lær meg! for du er min Frelse-Gud, på deg ventar eg all dagen.

⁶Herre, kom i hug di miskunn og dine nådeverk! for dei er frå æveleg tid.

⁷Kom ikkje i hug min ungdoms synder og mine misgjerningar! Kom meg i hug etter di miskunn for din godhug skuld, Herre!

⁸Herren er god og rettvis; difor lærer han syndarar vegen.

⁹Han leider dei spaklyndte i det som rett er, og lærer dei spaklyndte sin veg.

¹⁰Alle Herrens stigar er miskunn og truskap mot dei som held hans pakt og hans vitnemål.

¹¹For ditt namn skuld, Herre, forlat meg mi misgjerning! for ho er stor!

¹²Kven er den mann som ottast Herren? Honom lærer han den veg han skal velja.

¹³Hans sjel skal stødt bu i sæla, og hans avkjøme skal erva landet.

¹⁴Herren hev samlag med dei som ottast han, og hans pakt skal verta kunngjord for dei.

¹⁵Mine augo er stendigt vende til Herren, for han dreg mine føter ut or garnet.

¹⁶Vend deg til meg og ver meg nådig! for eg er einsleg og arm.

¹⁷Min hjarteverk hev dei gjort stor; før meg ut or mine trengslor! /[24]

¹⁸Sjå min armodsdom og mi møda, og forlat meg alle mine synder!

¹⁹Sjå mine fiendar, dei er mange, og dei hatar meg med rettlaust hat.

²⁰Vara mi sjel og berga meg, lat meg ikkje verta til skammar! for eg flyr til deg.

²¹Lat uskyld og ærlegdom verja meg! for eg ventar på deg.

²²Å Gud, løys Israel ut or alle sine trengslor!