Read nynorsk 1938 Salmane 26 Bible Online

Salmane 26 - nynorsk 1938 bible

Salmane 26

¹Av David. / Hjelp meg til min rett, Herre! for eg hev fare fram i mi uskyld, og til Herren hev eg sett mi lit uruggeleg.

²Prøv meg, Herre, og røyn meg, ransaka mine nyro og mitt hjarta!

³For di miskunn er for mine augo, og eg ferdast i din truskap.

⁴Eg sit ikkje saman med ljugarar og gjeng ikkje inn hjå fule folk.

⁵Eg hatar samkoma av illmenne, og hjå dei ugudlege sit eg ikkje.

⁶Eg tvær mine hender i uskyld og vil gjerne ferdast um ditt altar, Herre,

⁷til å kveda lydt med lovsongs røyst og fortelja um alle dine under.

⁸Herre, eg elskar di husvist, den stad der din herlegdom bur.

⁹Riv ikkje mi sjel burt med syndarar eller mitt liv med blodgjeruge menner,

¹⁰som hev skamgjerd i sine hender og si høgre hand full av mutor!

¹¹Men eg fer fram i mi uskyld; løys meg ut og ver meg nådig!

¹²Min fot stend på slettlende; i samlingane skal eg lova Herren.