Read nynorsk 1938 Salmane 34 Bible Online

Salmane 34 - nynorsk 1938 bible

Salmane 34

¹Av David, då han tedde seg galen hjå Abimelek, so han jaga han av, og han gjekk burt.

²Eg vil lova Herren til kvar tid, hans pris skal stendigt vera i min munn.

³Mi sjel skal rosa seg av Herren; dei spaklyndte skal høyra det og gleda seg.

⁴Lova Herrens storvelde med meg, og lat oss saman upphøgja hans namn!

⁵Eg søkte Herren, og han svara meg og fria meg frå alt det som skræmde meg.

⁶Dei som skoda upp til han, lyste av gleda, og deira andlet turvte aldri blygjast.

⁷Her er ein arming som ropa, og Herren høyrde og frelste han or alle hans trengslor.

⁸Herrens englar lægrar seg rundt ikring dei som ottast han, og han friar dei ut.

⁹Smaka og sjå at Herren er god! Sæl er den mann som flyr til han.

¹⁰Ottast Herren, de hans heilage! For inkje vantar dei som ottast han.

¹¹Unge løvor lid naud og svelt, men dei som søkjer Herren, dei vantar det inkje godt.

¹²Kom born, høyr meg! Eg vil læra dykk otte for Herren.

¹³Kven er den mann som hev lyst til liv, som ynskjer seg dagar til å sjå lukka.

¹⁴Haldt tunga frå det som vondt er, og lippone frå svikfull tale!

¹⁵Vik burt frå det vonde og gjer det gode, søk fred og far etter han!

¹⁶Herrens augo er vende til dei rettferdige, og hans øyro til deira rop.

¹⁷Herrens åsyn er imot dei som gjer vondt, til å rydja ut deira minne frå jordi.

¹⁸Hine ropar, og Herren høyrer og friar dei ut or alle deira trengslor.

¹⁹Herren er nær hjå dei som hev eit sundbrote hjarta, og frelser dei som hev ei hugsprengd ånd.

²⁰Mange ulukkor kjem yver den rettferdige, men Herren friar han ut or dei alle.

²¹Herre tek vare på alle hans bein, ikkje eitt av dei vert brote.

²²Ulukka drep den ugudlege, og dei som hatar den rettferdige, vert saka.

²³Herren løyser ut deira sjel som tener han, og av dei som flyr til han, vert ingen saka.