Read nynorsk 1938 Salmane 38 Bible Online

Salmane 38 - nynorsk 1938 bible

Salmane 38

¹Ein salme av David; til minne.

²Herre, refs meg ikkje i din vreide, og tukta meg ikkje i din harm!

³For dine piler hev råma meg, og di hand hev falle tungt på meg.

⁴Det finst inkje friskt i mitt kjøt for din vreide skuld, det er ingen fred i mine bein for mi synd skuld.

⁵For mine misgjerningar stig meg yver hovudet, som ei tung byrd er dei meg for tunge.

⁶Det tevjar av mine sår, dei renn av verk for min dårskap skuld.

⁷Eg er krøkt, reint samanbøygd, heile dagen gjeng eg syrgjeklædd.

⁸For mine lender er fulle av brand, og det finst inkje frisk i mitt kjøt.

⁹Eg er valen og reint sundslegen, eg skrik høgt av hjartestynjing.

¹⁰Herre, for di åsyn er alt mitt ynske, og min sukk er ikkje løynd for deg.

¹¹Mitt hjarta slær hardt, mi kraft hev forlate meg, og jamvel mine augo hev mist sitt ljos for meg.

¹²Mine vener og frendar held seg undan frå mi plaga, og mine næmaste stend langt burte.

¹³Dei som stend meg etter livet, legg ut snaror, og dei som søkjer mi ulukka, talar um undergang, og på svik tenkjer dei heile dagen.

¹⁴Og eg er som ein dauv, eg høyrer ikkje, og liksom ein mållaus, som ikkje let upp sin munn.

¹⁵Ja, eg er som ein mann som ikkje høyrer, og som ikkje hev motmæle i sin munn.

¹⁶For til deg, Herre, stend mi von; du vil svara, Herre min Gud!

¹⁷For eg segjer: Dei vil elles gleda seg yver meg; når min fot vert ustød, høgmodast dei yver meg.

¹⁸For eg er nær på å falla, og min hugverk er stendigt framfor meg.

¹⁹For eg lyt sanna mi misgjerning, eg syrgjer yver mi synd.

²⁰Og mine fiendar lever, dei er mannsterke, og dei er mange som hatar meg utan årsak

²¹Og dei som løner godt med vondt, stend meg imot, av di eg fer etter det gode.

²²Forlat meg ikkje, Herre! Min Gud, ver ikkje langt ifrå meg!

²³Skunda deg og hjelp meg, Herre, mi frelsa!