Read nynorsk 1938 Salmane 40 Bible Online

Salmane 40 - nynorsk 1938 bible

Salmane 40

¹Til songmeisteren, av David; ein salme.

²Eg venta og venta på Herren; då bøygde han seg til meg og høyrde mitt rop.

³Han drog meg upp or den tynande gravi, or søkkjedya, og han sette mine føter uppå berggrunn, han gjorde mine steg støde.

⁴Og han la ein ny song i min munn, ein lovsong til vår Gud. Mange ser det og ottast og lit på Herren.

⁵Sæl er den mann som set si lit til Herren og ikkje vender seg til dei ovmodige og til dei som vik av til lygn.

⁶Herre min Gud, du hev gjort dine under og dine råder mangfaldige mot oss; ingen ting er liknande med deg; vil eg kunngjera dei og tala um dei, er dei for mange til å telja.

⁷Slaktoffer og matoffer hev du ikkje hug til - du hev bora øyro på meg - brennoffer og syndoffer krev du ikkje.

⁸Då sa eg: Sjå, eg kjem; i bokrullen er det sagt meg fyre: /[35]

⁹å gjera din vilje, min Gud, er mi lyst, og di lov er i mitt hjarta.

¹⁰Eg bar fagnadbod um rettferd i ei stor samling; sjå, eg let ikkje att mine lippor; Herre, du veit det.

¹¹Eg løynde ikkje di rettferd i mitt hjarta, eg kunngjorde din truskap og di frelsa; eg dulde ikkje din nåde og di sanning for ei stor samling.

¹²Du, Herre, vil ikkje lata att di miskunn for meg; din nåde og di sanning vil alltid vakta meg.

¹³For trengslor utan tal hev umspent meg, mine misgjerningar hev gripe meg, so eg ikkje kann sjå; dei er fleire enn håri på mitt hovud, og mitt mod hev forlate meg.

¹⁴Hugnast. Herre, å fria meg ut! Herre, skunda deg og hjelp meg!

¹⁵Lat dei verta til skam og spott alle dei som stend meg etter livet og vil riva det burt! Lat dei vika attende og skjemmast dei som ynskjer meg vondt!

¹⁶Lat dei verta forfærde yver si skjemd dei som segjer til meg: Ha, ha!

¹⁷Lat dei fegnast og gleda seg i deg alle dei som søkjer deg! Lat dei som elskar di frelsa, alltid segja: Høglova vere Herren!

¹⁸For eg er arm og fatig; Herren vil tenkja på meg. Du er mi hjelp og min frelsar; min Gud, dryg ikkje!