Read nynorsk 1938 Salmane 41 Bible Online

Salmane 41 - nynorsk 1938 bible

Salmane 41

¹Til songmeisteren; ein salme av David.

²Sæl er den som ser til vesalmannen; på den vonde dag skal Herren frelsa han.

³Herren skal verja han og halda han i live; han skal verta lukkeleg i landet, og du skal visst ikkje yvergjeva han til hans mordgjeruge fiendar.

⁴Herren skal stydja han på sottesengi; all hans lega lagar du um i hans sjukdom.

⁵Eg segjer: Herre, ver meg nådig, læk mi sjel! for eg hev synda mot deg.

⁶Mine fiendar talar vondt um meg: Når skal han døy, og hans namn forgangast?

⁷Og um ein kjem og vil sjå til meg, so talar han falske ord; hans hjarta sankar seg vondskap saman, og so gjeng han ut og talar um det.

⁸Alle som hatar meg, kviskrar saman imot meg; dei tenkjer upp imot meg slikt som er meg til skade:

⁹Ei illgjerning heng ved han, og han som ligg der, skal ikkje meir standa upp.

¹⁰Ja, endå den som eg levde i fred med, som eg sette lit til, som åt mitt brød, hev lyft sin hæl imot meg.

¹¹Men du, Herre, ver meg nådig og hjelp meg upp! So vil eg gjeva dei lika for det.

¹²På dette kjenner eg at du hev hugnad i meg, at min fiende ikkje fær setja i glederop yver meg.

¹³Og meg held du uppe i mi uskyld og set meg for di åsyn til æveleg tid.

¹⁴Lova vere Herren, Israels Gud, frå æva til æva! Amen, amen.