Read nynorsk 1938 Salmane 42 Bible Online

Salmane 42 - nynorsk 1938 bible

Salmane 42

¹Til songmeisteren; ein song til lærdom, av Korahs born.

²Som ein hjort styn etter rennande bekker, so styn mi sjel etter deg, min Gud!

³Mi sjel tyrster etter Gud, etter den levande Gud. Når skal eg koma og te meg for Guds åsyn?

⁴Mine tåror er min mat dag og natt, av di dei all dagen segjer til meg: Kvar er din Gud?

⁵Dette lyt eg koma i hug og tøma ut mi sjel i meg: korleis eg drog fram i manntrongen og vandra med dei til Guds hus med fagnadrøyst og lovsong, ein høgtidleg folkestraum.

⁶Kvi er du nedbøygd, mi sjel, og bruser i meg? Venta på Gud! for eg skal endå lova han for frelsa frå hans åsyn.

⁷Min Gud! Mi sjel er nedbøygd i meg; difor kjem eg deg i hug frå Jordanlandet og Hermonhøgdene, frå det vesle fjellet. /[36]

⁸Vassflod ropar til vassflod ved duren av dine fossar; alle dine brotsjøar og båror slær yver meg.

⁹Um dagen sender Herren si miskunn, og um natti er hans song hjå meg, bøn til mitt livs Gud.

¹⁰Eg lyt segja til Gud, mitt berg: Kvi hev du gløymt meg? Kvi skal eg ganga syrgjeklædd under fiendetrykk?

¹¹Det er som mine bein vart knasa, når mine fiendar spottar meg, med di dei heile dagen segjer til meg: Kvar er din Gud?

¹²Kvi er du nedbøygd, mi sjel, og kvi bruser du i meg? Venta på Gud! for eg skal endå lova han, mi åsyns frelsa og min Gud.