Read nynorsk 1938 Salmane 45 Bible Online

Salmane 45 - nynorsk 1938 bible

Salmane 45

¹Til songmeisteren, etter “Liljor”[37]

²Mitt hjarta fløder yver med yndelege ord; eg segjer: Mitt kvede er um ein konge; mi tunga er ein snarhendt skrivars griffel.

³Du er den fagraste av mannsborni, ynde er utrend på dine lippor; difor hev Gud velsigna deg til æveleg tid.

⁴Bitt til lendi ditt sverd, du veldige, di høgd og din herlegdom!

⁵Og far i din herlegdom sigrande fram for sanning og rettferdigt spaklynde! Og di høgre hand skal læra deg agelege storverk.

⁶Din piler er kveste, folkeslag fell under deg, dei gjeng inn i hjarta på kongens fiendar.

⁷Din kongsstol, Gud, stend æveleg og alltid; ein kongsstav med rettvisa er kongsstaven i ditt rike.

⁸Du elskar rettferd og hatar gudløysa, difor hev Gud, din Gud, salva deg med fagnads olje framfor dine medbrør.

⁹Av myrra og aloë og kassia angar alle dine klæde; frå filsbeinslott fagnar deg strengleik.

¹⁰Kongsdøtter er millom dine utvalde; dronningi stend ved di høgre hand i gull frå Ofir.

¹¹Høyr, dotter, og gjev gaum og halla øyra til, og gløym ditt folk og ditt farshus,

¹²og lat kongen hava hugnad i din fagerleik! For han er din herre, og du skal falla ned for han.

¹³Og Tyrus' dotter skal søkja ditt ynde med gåvor - rikmennene i folket.

¹⁴Ovleg prud er kongsdotteri der inne; hennar klædnad er gjenomvoven med gull.

¹⁵I utsauma bunad vert ho leidd til kongen; møyar, hennar vener, fylgjer henne; dei vert førde inn til deg.

¹⁶Dei vert leidde fram med gleda og fagnad, dei gjeng inn i kongsslottet.

¹⁷I staden for dine feder skal dine søner koma; du skal setja dei til hovdingar utyver heile jordi.

¹⁸Eg vil prisa ditt namn millom alle ætter; difor skal folki lova deg æveleg og alltid.