Read nynorsk 1938 Salmane 46 Bible Online

Salmane 46 - nynorsk 1938 bible

Salmane 46

¹Til songmeisteren; av Korahs born, etter Alamot; ein song. /[38]

²Gud er vår hyggja og vår styrke, ei hjelp i trengslor, røynd og funni stor.

³Difor ottast me ikkje, um so jordi vert umskift, og um fjelli ragar i havsens hjarta,

⁴um havbårone dyn og skumar, og fjelli skjelv for deira ofse. Sela.

⁵Der er ei å, hennar bekker gled Guds by, den heilage stad der den Høgste bur.

⁶Gud er midt i han, so han skal ikkje rugga; Gud hjelper han i morgonlysingi.

⁷Folkeslag rasa, rike vart rikka; han let si røyst ljoda, jordi bråna.

⁸Herren, allhers Gud, er med oss; Jakobs Gud er vår faste borg. Sela.

⁹Kom og sjå Herrens storverk, som hev gjort øydeleggjing på jordi.

¹⁰Han gjer ende på herferder yver all jordi, bryt bogen sund og høgg spjotet av; stridsvognene brenner han upp i eld.

¹¹Hald upp og kjenn at eg er Gud! Eg er upphøgd millom folki, upphøgd på jordi.

¹²Herren, allhers Gud, er med oss; Jakobs Gud er vår faste borg. Sela.