Read nynorsk 1938 Salmane 49 Bible Online

Salmane 49 - nynorsk 1938 bible

Salmane 49

¹Til songmeisteren; av Korahs born; ein salme.

²Høyr dette, alle folk, vend øyra til, alle de som bur i verdi,

³både låge og høge, rike og fatige, alle saman!

⁴Min munn skal tala visdom, og det som mitt hjarta tenkjer upp, er vit.

⁵Eg vil halla mitt øyra til fyndord, eg vil segja fram mi gåta til harpeljod.

⁶Kvi skal eg ottast i dei vonde dagar, når vondskap av mine forfylgjarar kringset meg,

⁷dei som set si lit til sitt gods og rosar seg av sin store rikdom?

⁸Ein mann kann ikkje løysa ut ein bror, kann ikkje gjeva Gud løysepengar for han

⁹- utløysingi av deira liv er for dyr, og han lyt lata det vera til æveleg tid -

¹⁰so han skulde halda ved å leva for alltid og ikkje sjå gravi.

¹¹Nei, han skal få sjå henne. Vismenner døyr, dåre og fåviting gjeng burt alle saman og let sitt gods etter seg til andre.

¹²Einaste tanken i deira hjarta er at deira hus skal standa æveleg, deira bustader frå ætt til ætt; dei kallar sin jorder etter sine namn.

¹³Men eit menneske i herlegdom vert ikkje verande; han er lik dyri, som gjeng til grunns.

¹⁴So gjeng det dei som er fulle av tru til seg sjølve, og dei som fylgjer etter dei og likar deira tale. Sela.

¹⁵Som sauer vert dei førde ned i helheimen, dauden gjæter dei, og dei trurøkne råder yver dei, når morgonen renn; og deira skapnad vert øydelagd av helheimen, so dei hev ingen heimstad lenger.

¹⁶Men Gud skal løysa ut mi sjel or helheims vald; for han skal taka meg til seg. Sela.

¹⁷Ottast ikkje når ein mann vert rik, når hans hus kjem til stor herlegdom!

¹⁸For han skal ingen ting taka med seg når han døyr; hans herlegdom skal ikkje fara ned etter han.

¹⁹Um han og velsignar si sjel i si livstid, og dei prisar deg for di du gjer deg gode dagar,

²⁰so skal du då koma til di fedreætt, dei som ikkje ser ljoset i all æva.

²¹Eit menneske i herlegdom, som ikkje hev vit, er lik dyri, som gjeng til grunns.