Read nynorsk 1938 Salmane 50 Bible Online

Salmane 50 - nynorsk 1938 bible

Salmane 50

¹Ein salme av Asaf. / Den Allmektige, Gud Herren, talar og kallar på jordi frå solekoma til soleglad.

²Frå Sion, fagerleiks kruna, strålar Gud fram.

³Vår Gud kjem og skal ikkje tegja. For hans åsyn gjeng etande eld, og ikring han stormar det sterkt.

⁴Han kallar på himmelen ovantil og på jordi til å døma sitt folk:

⁵Samla til meg mine trugne, som hev gjort pakt med meg um offer!

⁶Og himmelen kunngjer hans rettferd; for Gud er den som skal halda dom. Sela.

⁷Høyr, mitt folk, eg vil tala, Israel, eg vil vitna for deg; Gud, din Gud, er eg.

⁸Ikkje for dine offer vil eg straffa deg; dine brennoffer er alltid framfor meg.

⁹Eg vil ikkje taka uksar frå ditt hus eller bukkar frå dine grindar.

¹⁰For meg høyrer alle dyr i skogen til, dyri på fjelli i tusundtal.

¹¹Eg kjenner alle fuglar på fjelli, og det som rører seg på marki, er meg for augo.

¹²Um eg var hungrig, vilde eg ikkje segja det til deg; for meg høyrer jordriket til med alt det som fyller det.

¹³Skulde eg eta kjøt av uksar og drikka blod av bukkar?

¹⁴Ofra lov og takk til Gud og gjev den Høgste det du hev lova,

¹⁵og kalla på meg den dag du er i naud, so vil eg fria deg ut, og du skal prisa meg.

¹⁶Men til den ugudlege segjer Gud: Kva hev du med å fortelja um mine lover og taka mi pakt i din munn,

¹⁷etter di du hatar tukt og kastar mine ord attum deg?

¹⁸Når du ser ein tjuv, er du gjerne med han, og med horkarar slær du lag.

¹⁹Din munn slepper du laus med det som vondt er, og di tunga spinn i hop svik.

²⁰Du sit og talar imot bror din, du baktalar son åt mor di.

²¹Dette gjorde du, og eg tagde; so tenkte du eg var liksom du sjølv; men eg vil straffa deg og setja det fram for augo dine.

²²Gjev gaum etter dette, de som gløymer Gud, so eg ikkje skal riva sund, og ingen frelser!

²³Den som ofrar meg takk, han ærar meg, og den som gjeng den rette veg, han vil eg lata sjå Guds frelsa!