Read nynorsk 1938 Salmane 55 Bible Online

Salmane 55 - nynorsk 1938 bible

Salmane 55

¹Til songmeisteren, med strengeleik; ein salme til lærdom av David.

²Gud, vend øyra til mi bøn, og løyn deg ikkje for mi naudbeding!

³Gjev gaum etter meg og svara meg! Mine sorgfyllte tankar fer hit og dit, og eg lyt stynja

⁴for rop frå fienden, for trykk frå den ugudlege; for dei velter vondt yver meg, og i vreide forfylgjer dei meg.

⁵Mitt hjarta skjelv i min barm, og dauderedslor hev falle på meg.

⁶Otte og skjelving kjem yver meg, og fæla legg seg på meg.

⁷Og eg segjer: Gjev eg hadde venger som duva! Då skulde eg fljuga burt og finna ein bustad.

⁸Sjå, eg vilde fly langt burt, eg vilde finna herbyrge i øydemarki. Sela.

⁹Eg vilde skunda meg i livd for den føykjande vinden, for stormen.

¹⁰Gløyp dei, Herre, kløyv deira tungemål! For eg ser vald og kiv i byen.

¹¹Dag og natt gjeng dei kringum han på murane, og naud og ulukka råder der inne.

¹²Tjon råder der inne, og vald og svik vik ikkje frå torget.

¹³For ikkje ein fiende er det som hæder meg - det kunde eg tola; ikkje min uven er det som briskar seg mot meg - då kunde eg gøyma meg for han;

¹⁴men du er det, du som var min likemann, min ven og min kjenning -

¹⁵me som hadde hugleg samråd med kvarandre, som gjekk til Guds hus i det glade festfylgjet.

¹⁶Lat øyding koma yver dei! Lat dei fara ned til helheimen levande! For vondskap råder i deira bustad, i deira hjarta.

¹⁷Eg vil ropa til Gud, og Herren skal frelsa meg.

¹⁸Kveld og morgon og middag vil eg klaga og sukka, so høyrer han mi røyst.

¹⁹Han løyser ut mi sjel frå striden mot meg og gjev meg fred; for mange er dei mot meg.

²⁰Gud skal høyra og svara dei - han tronar då frå fordoms tid, sela - dei som ikkje vil verta annarleis og som ikkje ottast Gud. /[42]

²¹Han legg hand på folk som held fred med han, han vanhelgar si pakt. /

²²Ordi frå hans munn er håle som smør, men hans hjarta tenkjer på strid. Hans ord er mjukare enn olje, og dei er då dregne sverd.

²³Kasta byrdi di på Herren! Han skal halda deg uppe; han skal i all æva ikkje lata den rettferdige verta rikka.

²⁴Og du, Gud, skal støyta dei ned i den djupe grav; blodgjeruge og falske menner skal ikkje nå til helvti av si levetid; men eg set mi lit til deg.