Read nynorsk 1938 Salmane 56 Bible Online

Salmane 56 - nynorsk 1938 bible

Salmane 56

¹Til songmeisteren, etter “Den mållause duva langt burte”[43][44]

²Ver meg nådig, Gud! for menneske vil sluka meg; heile dagen trengjer dei meg med strid.

³Mine fiendar freistar å sluka meg heile dagen; for mange er dei som i stormod strider imot meg.

⁴Den dagen då eg ottast, set eg mi lit til deg.

⁵Ved Gud prisar eg hans ord; til Gud set eg lit, eg ottast ikkje; kva skulde kjøt kunna gjera meg?

⁶Heile dagen rengjer dei mine ord; alle deira tankar er imot meg til det som vondt er.

⁷Dei slær seg saman, dei lurer, dei vaktar på mine steg, av di dei trår etter livet mitt.

⁸Skulde dei med sin vondskap koma seg undan? Gud, støyt folkeslag ned i vreide!

⁹Du hev talt kor ofte eg hev fare på flukt; mine tåror er gøymde i di flaska; stend dei ikkje i di bok?

¹⁰Då skal mine fiendar venda attende, den dagen eg ropar; det veit eg at Gud er med meg.

¹¹Ved Gud prisar eg ordet; ved Herren prisar eg ordet.

¹²Til Gud set eg lit, eg ottast ikkje; kva kann eit menneske gjera meg?

¹³Gud, eg hev lovnader på meg til deg; eg vil løysa dei med takkoffer til deg.

¹⁴For du hev berga mi sjel frå dauden, ja mine føter frå fall, so eg kann ferdast for Guds åsyn i ljoset åt dei levande.