Read nynorsk 1938 Salmane 65 Bible Online

Salmane 65 - nynorsk 1938 bible

Salmane 65

¹Til songmeisteren; ein salme av David; ein song.

²Gud, dei er stille for deg og prisar deg på Sion, og dei gjev deg det dei hev lova.

³Du som høyrer bøner, til deg kjem alt kjøt.

⁴Når mine misgjerningar hev vorte for tunge for meg, so forlet du våre brot.

⁵Sæl er den som du vel ut og let koma nær, so han bur i dine fyregardar; me vil metta oss med det gode i ditt hus, ditt heilage tempel.

⁶Med skræmelege gjerningar bønhøyrer du oss i rettferd, du vår Frelse-Gud, du som er ei livd for alle heimsens endar og havet langt burte.

⁷Han gjer fjelli faste med si kraft, gyrd med velde.

⁸Han døyver havsens dur, bylgjeduren og bråket av folkeslagi.

⁹Og dei som bur ved endane av jordi, reddast for dine teikn; heimen for morgon og kveld fyller du med fagnadrop.

¹⁰Du hev gjesta jordi og gjeve henne ovnøgd, du hev gjort henne ovleg rik, Guds bekk er full av vatn; du hev late dei få sitt korn, for soleis lagar du jordi til.

¹¹Du vatna hennar plogforer, jamna dei med upp-pløgde åkrar; du bløytte henne med regnskurer, velsigna hennar grøda.

¹²Du hev krynt året med din godleik, og dine fotfar dryp av feitt.

¹³Beiti i øydemarki dryp, og haugane gyrdar seg med fagnadrop.

¹⁴Engjane er klædde med sauer, og dalane sveiper seg i korn; folk ropar med fagnad og syng.