Read nynorsk 1938 Salmane 72 Bible Online

Salmane 72 - nynorsk 1938 bible

Salmane 72

¹Av Salomo. / Gud, Gjev kongen dine domar og kongssonen di rettferd!

²Han skal døma ditt folk med rettferd og dine armingar med rett.

³Fjelli skal bera fred for folket, og like eins haugane for rettferd skuld.

⁴Han skal døma armingane i folket, han skal frelsa borni åt den fatige og knasa valdsmannen.

⁵Dei skal ottast deg so lenge soli skin, og so lenge månen lyser, frå ætt til ætt.

⁶Han skal koma ned som regn på nyslegen voll, lik ei regnskur, som væter jordi.

⁷I hans dagar skal den rettferdige bløma og det skal vera mykje fred, alt til det ingen måne er meir.

⁸Og han skal hava herredom frå hav til hav og frå elvi til endane av jordi.

⁹Dei som bur i øydemarki, skal bøygja kne for han, og hans fiendar skal slikka mold.

¹⁰Kongane frå Tarsis og øyane skal bera fram gåvor, kongane frå Sjeba og Seba skal koma med skatt.

¹¹Alle kongar skal fall ned for han, alle heidningar skal tena han.

¹²For han skal frelsa den fatige som ropar, og armingen som ingen hjelpar hev.

¹³Han skal spara vesalmannen og den fatige, og sjelene åt dei fatige skal han frelsa.

¹⁴Frå trykk og vald skal han løysa deira sjel, og dyrt skal blodet deira vera i hans augo.

¹⁵Og dei skal leva og gjeva han gull frå Sjeba og alltid beda for han; heile dagen skal dei lova han.

¹⁶Det skal vera ei ovnøgd med korn i landet, på fjelltoppane, grøda skal susa som Libanonskogen, og folk skal bløma fram i byane som gras på jordi.

¹⁷Hans namn skal vara i all æva; so lenge soli skin, skal hans namn setja nye renningar, og dei skal velsigna seg ved han; alle heidningar skal prisa han sæl.

¹⁸Lova vere Gud Herren, Israels Gud, han, den einaste som gjer under!

¹⁹Og lova vere hans herlege namn i all æva, og all jordi verte full av hans herlegdom! Amen, amen.

²⁰Ende på bønene av David, son åt Isai.