Read nynorsk 1938 Salmane 77 Bible Online

Salmane 77 - nynorsk 1938 bible

Salmane 77

¹Til songmeisteren, for Jedutun; av Asaf; ein salme. /[76]

²Eg ropar til Gud, og eg vil skrika; eg ropar til Gud, og han vil venda øyra til meg.

³Den dagen eg er i naud, søkjer eg Herren; um natti retter eg ut handi, og ho vert ikkje trøytt, mi sjel vil ikkje lata seg trøysta.

⁴Eg vil koma Gud i hug og sukka; eg vil tenkja etter, og mi ånd ormektast. Sela.

⁵Du held augo mine opne i nattevaktene; eg er uroleg og talar ikkje.

⁶Eg tenkjer på fordoms dagar, på lengst framfarne år.

⁷Eg vil koma i hug min strengleik um natti, i mitt hjarta vil eg grunda, og mi ånd ransakar.

⁸Vil då Herren æveleg støyta burt, og vil han ikkje lenger visa nåde?

⁹Er det for all tid ute med hans miskunn? Hev hans lovnad vorte upp i inkje frå ætt til ætt?

¹⁰Hev Gud gløymt å vera nådig? Hev han i vreide stengt for sin godhug? Sela.

¹¹Eg segjer: Dette er mi plaga, det er år frå høgre handi åt den Høgste.

¹²Eg vil forkynna Herrens gjerningar; for eg vil minnast dine under frå fordoms tid.

¹³Og eg vil tenkja etter alt ditt verk, og på dine store gjerningar vil eg grunda.

¹⁴Gud! I heilagdom er din veg; kven er ein gud, stor som Gud?

¹⁵Du er den Gud som gjer under; du hev kunngjort din styrke millom folkeslagi.

¹⁶Du hev løyst ditt folk ut med velde, borni åt Jakob og Josef. Sela

¹⁷Vatni såg deg, Gud, vatni såg deg og bivra, ja djupi skalv.

¹⁸Skyene gav vatn, himmelen dunde, ja dine piler flaug ikring.

¹⁹Di tora dunde i kvervelstormen, eldingar lyste upp jordriket, jordi skalv og riste.

²⁰Gjenom havet gjekk din veg, og dine stigar gjenom store vatn, og dine fotfar vart ikkje kjende.

²¹Du førde ditt folk som ei hjord ved handi åt Moses og Aron.