Read nynorsk 1938 Salmane 80 Bible Online

Salmane 80 - nynorsk 1938 bible

Salmane 80

¹Til songmeisteren; etter “Liljor”[80]

²Du Israels hyrding, vend øyra til, du som fører Josef som ei hjord! Du som tronar yver kjerubane, syn deg herleg!

³Vekk upp ditt velde for Efra'im og Benjamin og Manasse, og kom oss til hjelp!

⁴Gud, reis oss upp att, og lat ditt andlet lysa, so me vert frelste!

⁵Herre, Gud, Allhers Gud, kor lenge hev du late din vreide rjuka og ikkje ansa bøni frå folket ditt!

⁶Du hev gjeve dei tårebrød til å eta og tåror til å drikka i fullt mål.

⁷Du gjer oss til eit trettemål for våre grannar, og våre fiendar spottar med lyst.

⁸Gud, allhers Gud, reis upp att, og lat ditt andlet lysa, so me vert frelste!

⁹Eit vintre flutte du frå Egyptarland, du dreiv heidningar ut og planta det.

¹⁰Du rudde rom for det, og det feste rot og fyllte landet.

¹¹Fjell vart løynde av skuggen frå det, og Guds sedrar frå greinene.

¹²Det strekte sine greiner ut til havet og sine renningar burt imot elvi.

¹³Kvi hev du rive ned gardane ikring det, so alle som gjeng framum på vegen, plukkar av det?

¹⁴Svinet frå skogen gneg på det, og dyri på marki beitar i det.

¹⁵Gud, allhers Gud, vend um att, skoda ned frå himmelen og sjå og hav umsut for ditt vintre,

¹⁶og verna um det som di høgre hand hev planta, og um den som du hev valt deg ut!

¹⁷Det er brent med eld, det er avhogge; for trugsel frå ditt andlet gjeng dei til grunns.

¹⁸Haldt di hand yver mannen ved di høgre hand, yver menneskesonen som du hev valt deg ut,

¹⁹so vil me ikkje vika frå deg! Gjer oss levande att, so vil me kalla på ditt namn!

²⁰Herre, Gud, allhers Gud, reis oss upp att, og lat ditt andlet lysa, so me vert frelste!